विराटनगर । मोरङ प्रहरीले अरूको नाममा परीक्षा लेखिदिएको आरोपमा तीन जनालाई विराटनगरबाट पक्राउ गरेको छ ।
प्रहरीले सप्तरीको राजविराज नगरपालिका- ४ का सन्तोष गुप्ता, सुनसरीको बर्जु गाउँपालिका– ५ चिमडीका विक्लप चौधरी र रामगञ्ज-४ का देवकृष्ण साहलाई समातेको हो ।
महेन्द्र मोरङ आदर्श बहुमुखी क्याम्पसमा अध्ययनरत दीपक यादवको परीक्षा लेखिदिएको अभियोगमा उनीहरूलाई पक्राउ गरिएको प्रहरीले जनाएको छ ।
यादव महेन्द्र मोरङ क्याम्पसका स्ववियु सदस्यसमेत हुन् । मोरङको रंगेली नगरपालिका घर भई विराटनगर मेनरोडमा डेरा लिएर बस्दै आएका छन् ।
उनी परीक्षा हलभित्र बसिरहने र अरुलाई डेराबाट उत्तर लेखेर ल्याउन लगाउने गरेको प्रहरीले जनाएको छ ।
उनको परीक्षा दिएको अभियोगमा पक्राउ परेका तीन जनालाई जिल्ला प्रहरी कार्यालय मोरङमा राखेर अनुसन्धान अगाडि बढाइएको डीएसपी वेदप्रकाश जोशीले जानकारी दिए ।
परीक्षा हलमा विद्यार्थी बसेको र उनीहरूले वाटसएपमार्फत प्रश्न आउट गर्ने गरेको खुलेको डिएसपी जोशीले बताए । नक्कली परीक्षार्थीले घरमा बसेर उत्तर लेखिदिने गरेको प्रहरीको अनुसन्धानबाट खुलेको छ ।
‘परीक्षा शुरू भएपछि वाटसएपबाट प्रश्न आउट भएको देखिन्छ,’ अनुसन्धानमा खटिएका एक प्रहरी अधिकृतले भने ‘उत्तर पुस्तिका भने कति बेला कसरी बुझाए भन्ने खुलेको छैन ।’
उनीहरूले परीक्षा लेख्ने गरेको कोठामा गाइड तथा अन्य पुस्तकहरू समेत भेटिएको र ती पुस्तकहरू नियन्त्रणमा लिएको प्रहरीले जनाएको छ ।
पक्राउ परेका ३ जनाले यादवको डेरामा बसेर उत्तर लेख्ने र उत्तर पुस्तिका क्याम्पससम्म पुर्याइदिने गरेको प्रहरीले जनाएको छ । दीपक भने परीक्षाहल भित्र नै रहेको प्रहरीले जनाएको छ ।
क्याम्पसमा बिबिएस र बीएड दोस्रो वर्षको ‘ब्याक पेपर’को परीक्षा चलिरहेको छ । यादवसहित अन्य एक जना विद्यार्थीको पनि उनीहरूले परीक्षा लेखिदिने गरेको प्रहरीले जनाएको छ । अर्का विद्यार्थीको नाम भने प्रहरीले गोप्य राखेको छ ।
यादवलाई यसअघि रङ्गेली नगरपालिकामा कर्मचारीलाई दुर्व्यवहार गरेको आरोपमा प्रहरीले नियन्त्रणमा लिएको थियो।
