विराटनगर । केही दिनदेखिको अविरल वर्षाका कारण मोरङको विराटनगर महानगरपालिकाका विद्यालयहरूमा बिदा दिइएको छ ।
विराटनगरकाे पोखरिया माध्यमिक विद्यालय र आदर्श माध्यमिक विद्यालयलगायतले शुक्रबार बिहान सूचना जारी गर्दै वर्षाका कारण विद्यालय बन्द रहने जानकारी दिएका हुन् ।
निरन्तर वर्षाले गर्दा विद्यालय आवतजावत गर्न र नियमित पठनपाठन सञ्चालन गर्न कठिनाइ भएकोले विद्यालय वर्षे बिदाबाट कट्टा हुने गरी बन्द रहने विद्यालयले जनाएका छन् ।
सामुदायिकबाहेक केही निजी स्कुलले पनि बिदा दिएका छन् ।
जल तथा मौसम पूर्वानुमान महाशाखाका अनुसार विराटनगरमा भारी वर्षा मापन भएको छ । १०० मिलिमिटर भन्दा धेरै वर्षा भएको खण्डमा भारी वर्षा मानिन्छ ।
महाशाखाका अनुसार विराटनगरमा २४ घण्टामा १४१.१ मिलिमिटर वर्षा भएको जनाइएको छ । विराटनगरमा देशभरका पाँचवटा स्थान भएको वर्षामध्ये दोस्रो भारी वर्षा मापन भएको हो ।
