विराटनगर । थारु महिलासभाले थारु र मधेसी महिलाहरुलाई लक्षित गरी आयोजना गरेको ‘जितिया सांस्कृतिक कार्यक्रम’ बुधबार सम्पन्न भएको छ ।
बर्जु गाउँपालिका-४ स्थित शिवमन्दिर टोलमा आयोजित कार्यक्रममा हजारौंको संख्यामा निरहार ब्रतातुहरुको उपस्थिति थियो ।
प्रमुख अतिथि दुहबी नगर प्रमुख वेदनारायण गच्छादारको प्रमुख आतिथ्यमा र थारु महिला सभाकी अध्यक्ष गंगादेवी शर्माको अध्यक्षतामा आयोजित उक्त कार्यक्रममा उल्लेखनीय अवलोकनकर्ताको सहभागिता रहेको थियो ।
थारु महिलासभा बर्जुकी अध्यक्ष बिनादेवी चौधरी, निवर्तमान गाउँपालिमा अध्यक्ष रघुनन्दन चौधरी, काङ्रेस नेता किशोर चौधरी, कांग्रेस कोशी प्रदेश सहमहामन्त्री प्रमिला गच्छादारसमेत उपस्थित थिए।
कार्यक्रमलाई सम्बोधन गर्दै दुहबी नगर प्रमुख गच्छादारले विविधतामा एकता रहेको हाम्रो समाजमा बसोबास गर्ने अनेक जातजाती, भाषाभाषी, धर्मावलम्बीहरुले मान्ने धर्म संस्कृति र परम्परालाई एकताको सुत्रमा बाँधी एकै छानोमुनि समेटेर कार्यक्रममा समावेश गर्नु लोकतन्त्रको सुन्दर पक्ष भएको बताए ।
‘समाज रूपान्तरित हुँदै गएको छ, कुनै एक जातबिषेसको मात्रै चाड रहेन । अब चाहे तिज होस्, चाहे रमदान होस्, चाहे जितिया होस् चाहे छैठ । पर्व नै हो सबै धर्मावलम्बीहरुले सामूहिक सहभागिता जनाउन थालेका छन् । यसले समाज अब परिवर्तन हुँदै गएको आभास भएको छ,’ उनले भने ।
सांस्कृतिक कार्यक्रममा स्थानीय कलाकारहरुको बेजोड प्रस्तुति रहेको थियो ।
