विराटनगर । कोशी प्रदेश प्रहरी कार्यालय विराटनगरले प्रहरी जवान टीकाराज खापुङलाई २०८१ साल भदौ महिनाको सर्वोत्कृष्ट प्रहरी घोषित गरेको छ ।
कोशी प्रदेश प्रहरी कार्यालयको अनुसन्धान समूहमा कार्यरत प्रहरी जवान खापुङलाई ‘बेस्ट पुलिस अफ द मन्थ’ घोषणा गरिएको हो ।
उनले गत भदौ २९ गते मोरङको ग्रामथान गाउँपालिका-४ स्थितबाट जुवा खेल्ने नौ जनाको समूहलाई जुवाको खालबाट १६ थान कौडा र १८ लाख ४९ हजार ५ सय रुपैयाँसहित समातेका थिए ।
जुवाको अखडामा छापा हानेर मोरङ ग्रामथान गाउँपालिकाका पूर्वअध्यक्षसमेत रहेका नेकपा एमालेका नेता शिवनारायण माझीसहित नौ जनालाई प्रहरीले समातेको थियो ।
त्यसअघि उनी गत भदौ ६ गते सुनसरीको धरान उप-महानगरपालिका-१३ स्थित कोशी लोकमार्गमा धनकुटाबाट आउँदै गरेको ट्रकमा ४४ वटा बोरामा रहेको १ हजार ४ सय २० किलोग्राम गाँजासहित दुई जनालाई नियन्त्रणमा लिन सफल भएका थिए ।
यसैगरी, उनले इटहरी उप-महानगरपालिका-१ स्थितबाट दुई सय ४३ किलो ५०० ग्राम तयारी गाँजा बोकेको कारसहित चालकलाई नियन्त्रणमा लिएका थिए भने भदौ १७ गते धरान-१३ निसाने स्थितबाट चारवटा बोरामा ९८ किलोग्राम गाँजा बोकेको कार नियन्त्रणमा लिएका थिए ।
सूक्ष्म रूपमा सूचना संकलन तथा निगरानी गरी अपराध नियन्त्रणमा महत्त्वपूर्ण भूमिका निर्वाह गरेको हुँदा प्रहरी जवान खापुङले गरेको उत्कृष्ट कार्यहरूको उच्च मूल्यांकन गर्दै कोशी प्रदेश प्रहरी कार्यालयले भदौ महिनाको सर्वोत्कृष्ट प्रहरी घोषणा गरी पुरस्कृत गरेको हो ।
