विरानटनगर । नजिकिँदै गरेको दसैं-तिहारलगायत चाडपर्वमा बजार अनुगमनलाई तीव्रता दिन माग राख्दै सुनसरीको दुहबफ नगरपालिका प्रमुख वेदनारायण गच्छादारलाई ज्ञापनपत्र बुझाइएको छ ।
उपभोक्ता मञ्च दुहवीले नजिकिँदै गरेको चाडपर्वमा उपभोक्ताहरू ठगिन सक्ने भन्दै नगरस्तरीय अनुगमन समिति गठन गरी बजार अनुगमनमा तीव्रता दिन मंगलबार नगर प्रमुख गच्छादारलाई ज्ञापनपत्र बुझाएको हो ।
नगर प्रमुखको कार्यकक्षमा मञ्चका अध्यक्ष तथा पदाधिकारीहरूले उक्त ज्ञापनपत्र बुझाएका हुन् ।
नजिकिँदै गरेको दसैं-तिहारमा आम नागरिकले वस्तु तथा सेवाको उपभोगमा मिसावटरहित पाउनुपर्ने, उचित मूल्यमा गुणस्तरीय सेवा पाउनुपर्ने भएकाले उक्त विषयको नियमन गर्न नगरस्तरीय अनुगमन समिति गठन गरी बजार अनुगमन गर्नु माग गरिएको छ ।
पत्र बुझ्दै नगर प्रमुख गच्छादारले उपभोक्ता मञ्च दुहबीले बुझाएको ज्ञापनपत्र समय सान्दर्भिक र नागरिकको जीवनप्रति लक्षित रहेको हुँदा यसलाई गम्भीरताका साथ लिएको र तत्काल यसबारे समिति गठन गरी अनुगमनमा तीव्रता दिइने बताए ।
उपभोक्ता मञ्चले स्थापनाकालदेखि नै नागरिकको वस्तु तथा सेवासँग सम्बन्धित सहज, सुलभ र स्वस्थ्य उपभोग्य सामग्री उपभोग गर्न पाउने अधिकारसम्बन्धी काम गर्दै आएको छ ।
दुहवीमा पनि केही समय उपभोक्ता मञ्च गठन भई अनुगमनको काम निरन्तर भइरहेको छ ।
