विराटनगर । नेपाल पञ्चांग निर्णायक विकास समितिले वि.सं. २०८१ को बडादशैंको उपलक्ष्यमा गरिने विभिन्न कार्यहरूको शुभसाइत सार्वजनिक गरेको छ ।
शुक्रबार सार्वजनिक साइतअनुसार नवरात्र आरम्भ तथा घटस्थापनको साइत असोज १७ गते बिहीबार बिहान ९:१६ बजे रहेको छ ।
यसैगरी, असोज १८ गते झण्डा फेर्ने (पश्चिम मोहडा) बिहान ९:१४ बजे छ भने पचली भैरव यात्रा असोज २२ गते मंगलबार परेको छ ।
असोज २४ गते बिहीबार फूलपाती, श्री तुलजा भवानी यात्रा बिहान ७:११ बजे, स्थिरासन बिहान ८:४३ मा शुभ साइत रहेको छ । यसैगरी, असोज २५ गते महाष्टमी, कालरात्रि र महानवमी एकै दिन परेको समितिले जनाएको छ ।
असोज २६ गते शनिबार विजया दशमी, देवी बिर्सन बिहान ८:३३ बजे शुभ साइत छ भने टीका लाइदिने (पूर्व मोहडा) र टीका लगाइ माग्ने पश्चिम फर्केर लगाउनु पर्ने छ ।
टीका लगाउने शुभसाइत बिहान ११:३६ बजे रहेको पञ्चांग निर्णायक समितिले जनाएको छ ।
असोज ४ गते समितिका कार्यकारी निर्देशक सूर्यप्रसाद ढुंगेल, सदस्य प्राडा देवमणि भट्टराई र अध्यक्ष प्राध्यापक श्रीकृष्ण अधिकारीद्वारा हस्ताक्षर गरिएको साइतमा सो कुरा उल्लेख छ ।
