विराटनगर । मोरङको विराटनगर महानगरपालिका–९ मा रहेको शिक्षादीप कलेजले कविता प्रतियोगिताको आयोजना गरेको छ । बिहीबार बिहान कलेजको सभाहलमा भएको कविता प्रतियोगितामा कक्षा ११ र १२ का विद्यार्थीहरूले कविता वाचन गरेका थिए ।
हरेक अगस्ट २९ अर्थात् आजको दिन मनाइने ‘Embrace a world free of nuclear weapons day’ लाई मध्येनजर गरी ‘शान्तिका लागि निश्शस्त्रीकरण’ शीर्षकमा कविता प्रतियोगिता गराइएको हो । कलेजका २५ सय विद्यार्थीहरूमध्येबाट पहिलो चरणको छनोटबाट ८० जनालाई कविता प्रतियोगितामा सहभागी गराइएको थियो ।
साहित्यकारहरू चुणामणि नेपाल ‘अकिंचन’, मीनकुमार नवोदित र कमलकिशोर श्रीवास्तवले प्रतियोगितामा निर्णायकको भूमिका निर्वाह गरेका थिए । तीन जनाको निर्णायक मण्डलीले उनीहरू सबैको कविता सुनेपछि कक्षा ११ विज्ञान संकायकी छात्रा मानसी पोखरेललाई प्रथम घोषणा गरेको थियो ।
यस्तै, इशान पौडेल, सिरिन भट्टराई, प्रतीक भट्टराईले दोस्रो स्थान हासिल गरे भने सम्पता रायमाझी, रितिक्षा भट्टराई, अपेक्षा राई, साम्राज्ञी बस्नेत तृतीय भए । यसैगरी, अफ्रिन खातुन, अमित पटेल, रोशनकुमार मण्डल, रमण मण्डल, मर्यादा भट्ट, प्रगति अधिकारी, सशन दाहाल र समीर साहले सान्त्वना पुरस्कार पाए ।
उनीहरूलाई कलेजका प्रिन्सिपल ज्ञानबहादुर खड्का, निर्णायकत्रयलगायतले प्रमाणपत्रसहित पुरस्कृत गरे ।
कार्यक्रममा बोल्दै प्रतियोगिताका निर्णायक साहित्यकार मीनकुमार नवोदितले विद्यार्थीहरूले पठनपाठनका अलाबा सिर्जनात्मक बनेर अतिरिक्त क्रियाकलापमा सहभागी हुनुपर्ने बताए ।
‘विद्यार्थीले सिर्जनशील बनेर सधैँभरि अगाडि सर्न जरुरी छ,’ उनले भने, ‘साहित्यतिर इच्छा जताउनु र सिर्जनशील बन्नुभनेको अमर पेसा अँगाल्नु हो ।’
यसैगरी कलेजका प्रिन्सिपल ज्ञानबहादुर खड्काले कविताका माध्यमबाट आफ्ना भावनाहरू पोख्न मिल्ने भएकाले पनि थकाहट हटाएर आनन्दपन ल्याउन प्रतियोगिताको आयोजना गरेको सुनाए ।
यसकारण पनि पहिलेदेखि नै साहित्यिक कार्यक्रमलाई प्राथमिकतामा राखेको बताउँदै उनले भावि दिनमा पनि निरन्तरता दिने सुनाए ।
‘कविता सुन्दा यति धेरै आनन्द आउँछ कि आफ्ना थकान मेटिन्छ,’ उनले भने, ‘कवितामार्फत् विद्यार्थीहरूले आफ्नो भावना पोख्न सक्नेछन्, मन शुद्ध बनाउने छन् । धेरै प्रतियोगी भएका कारण सबैलाई सहभागी गराउन सकेनौं । फेरि पनि यस्ता कार्यक्रम गरेर उनीहरूलाई मौका दिनेछौं ।’
कार्यक्रममा विज्ञान संकायका संयोजक नवीन रोय, व्यवस्थापन संकायका प्रमुख शंकर भट्टराई, कलेजका निर्देशक भुपेन्द्र दाहाल र रामचन्द्र अधिकारीसहित विद्यार्थीहरूको उल्लेखनीय उपस्थिति रहेको थियो ।
