विराटनगर । मोरङको रंगेली नगरपालिकामा मोटरसाइकल र साइकल एकापसमा ठोक्किँदा दुई जना घाइते भएका छन् ।
सोमबार साँझ ५:५० बजेतिर रंगेली-१ सखरदिनामा बबिया चोकबाट सखरदिनातर्फ जाँदै गरेको प्र १ -०४-००२ प २३ ९२ नम्बरको मोटरसाइकलले र विपरीत दिशाबाट आइरहेको साइकललाई ठक्कर दिएको थियो ।
दुर्घटनामा साइकलयात्री सुन्दरहरैंचा नगरपालिका-८ सलकपुर बस्ने ५० वर्षीय देवनाथ खवास र मोटरसाइकल चालक रंगेली-१ सखरदिना बस्ने २० वर्षीया नम्रता तवदार घाइते भएका हुन् ।
उनीहरूलाई उपचारको लागि रंगेली अस्पताल रंगेली पठाएको प्रहरीले जनाएको छ ।
नम्रता तवदारको टाउको र देब्रे खुट्टामा चोट लागेको छ भने साइकल यात्री खवासको देब्रे खुट्टामा सामान्य चोट लागेको छ ।
नम्रतासँग सवारी चालक अनुमतिपत्र साथमा नभएको र सडक खाल्टाखुल्टी हुँदा दुर्घटना भएको प्रहरीले जनाएको छ ।
