फाइल फोटो विराटनगर । मोरङको ग्रामथान गाउँपालिकामा मोटरसाइकलको ठक्करबाट स्कुटरमा सवार श्रीमान्-श्रीमती घाइते भएका छन् ।
बिहीबार साँझ ५:३० बजेतिर ग्रामथान-७ नेताचोक पेट्रोलपम्पस्थित घिनाघाट-विराटचोक सडकखण्डमा मोडिँदै गरेको स्कुटरलाई मोटरसाइकलले ठक्कर दिएको थियो ।
विराटनगरबाट विराटचोकतर्फ जाँदै गरेको को १९ प ९९०१ नम्बरको मोटरसाइकलले सोही दिशातर्फ जाँदै गरेको प्रदेश १-०२-०५२ प ५३२८ नम्बरको स्कुटरलाई पछाडिबाट ठक्कर दिएको थियो ।
उक्त दुर्घटनामा स्कुटर चालक बेलबारी नगरपालिका-६ बस्ने ३९ वर्षीय लालबाबु खवास र उनकी श्रीमती ३५ वर्षीय अंशु खवास घाइते भएका हुन् ।
उनीहरूलाई उपचारका लागि आर्या न्युरो अस्पताल, विराटनगर ल्याइएको छ । मोटरसाइकल चालक कानेपोखरी गाउँपालिका-५ का भवानीप्रसाद अधिकारी उनीहरूको उपचारमा संलग्न छन् ।
दुर्घटनामा परेका साधन भने इलाका प्रहरी कार्यालय हरैंचामा पुर्याइएको छ ।
