विराटनगर । निर्वाचन आयोगले मोरङको ग्रामथान गाउँपालिकासहित ३२ स्थानीय तहमा उपनिर्वाचनको तयारी थालेको छ ।
मंगलबार विज्ञप्ति जारी गर्दै आयोगले नगरपालिका प्रमुख, उपप्रमुख तथा गाउँपालिकाका अध्यक्ष, उपाध्यक्ष तथा वडाध्यक्ष गरी रिक्त रहेका ३४ पदका लागि उपनिर्वाचनको तयारी सुरु भएको जनाएको हो ।
२०७९ वैशाख ३० गते सम्पन्न स्थानीय तहको निर्वाचनपश्चात विभिन्न कारणले रिक्त रहेका ३२ पालिकाका ३४ पदमा उपनिर्वाचन हुन लागेको हो ।
कोशी प्रदेशका झापा, मोरङ, सुनसरी, तेह्रथुम, ओखलढुंगा र उदयपुरमा गाउँपालिका अध्यक्षसहित सात पद रिक्त रहेका छन् ।
ग्रामथान गाउँपालिका अध्यक्ष जयप्रकाश गच्छदारको गत असार ३ गते निधन भएपछि उक्त पद रिक्त रहेको छ ।
यस्तै, कन्काई नगरपालिका-६ को वडाध्यक्षका लागि उपनिर्वाचन हुने भएको छ भने तेह्रथुमको लालीगुराँस नगरपालिका-८, सुनसरीको गढी गाउँपालिका-६ ओखलढुंगाको मोलुङ गाउपालिका-६, उदपयुरको त्रियुगा नगरपालिका-१२ र बेलका नगरपालिका-८ का वडाध्यक्षका लागि उपनिर्वाचन हुने छ ।
आयोगले उपनिर्वाचनका लागि मतदाता नामावालीमा नाम दर्ता गर्न आह्वानसमेत गरेको छ ।
आयोगले आफूलाई पायक पर्ने प्रदेश तथा जिल्ला निर्वाचन कार्यालयमा अनलाइन फारामभरी नियमित रूपमा मतदाता नामावली दर्ताको व्यवस्था मिलाएबमोजिम योग्यता पुगेका सबै नेपाली नागरिकलाई नाम दर्ता गर्न आह्वान गरेको हो ।
