विराटनगर । मोरङको बूढीगंगा गाउँपालिकामा बसबाट झर्नेक्रममा लडेर एक युवती गम्भीर घाइते भएकी छन् ।
घाइते हुनेमा खोटाङको चिसापानी गाउँपालिका-६ बस्ने अन्दाजी ३२ वर्षीय सबिना बस्नेत रहेकी छन् ।
सोमबार बेलुका ८:४५ बजेतिर बूढीगंगा-२ गंगाचोकमा नेमुवाबाट विराटनगरतर्फ जाँदै गरेको प्रदेश १-०१-००१ ख ४४५९ नम्बरको बसबाट झर्ने क्रममा उनी लडेकी हुन् ।
उनको टाउको र दुवै खुटामा चोट लागेको प्रहरीले जनाएको छ । उनको विराट टिचिङ अस्पताल गंगाचौकमा उपचार भइरहेको छ ।
बस चालक मोरङको कटहरी गाउँपालिका-१ बस्ने ४४ वर्षीय मुकुन्द विश्वकर्मा र बस जिल्ला प्रहरी कार्यालय मोरङको नियन्त्रणमा रहेको छ ।
यात्रुको लापरबाहीका कारण दुर्घटना भएको प्रहरीको प्रारम्भिक अनुसन्धानबाट देखिएको छ । झर्न नजानेर तीव्र गतिकै बसबाट हामफाल्दा दुर्घटना भएको बसचालकले बताएका छन् ।
