विराटनगर । मोरङको विराटनगर महानगरपालिका-१४ मा सोमबार राति भएको सडक दुर्घटनामा एक जना घाइते भएका छन् ।
कोशी लोकमार्गमा मोटरसाइकलले पैदल यात्रीलाई ठक्कर दिँदा एक वृद्ध गम्भीर घाइते भएका हुन् ।
हिजो राति करिब ८:२० बजे भगवती चौक नजिक यो दुर्घटना भएको हो । विराटनगरबाट रानीतर्फ आउँदै गरेको एक अज्ञात मोटरसाइकलले पैदल यात्रीलाई ठक्कर दिएको थियो ।
दुर्घटनामा बिराटनगर महानगरपालिका-१४ का ७० वर्षीय अम्बर श्रेष्ठको टाउकोमा गम्भीर चोट लागेको छ ।
घाइते श्रेष्ठलाई तत्काल उपचारका लागि न्युरो अस्पताल लगिएको छ । उनको अवस्था गम्भीर रहेको बताइएको छ ।
दुर्घटना पश्चात मोटरसाइकल चालक फरार भएको र प्रहरीले खोजी कार्य जारी राखेको जनाएको छ।
प्रारम्भिक अनुसन्धानले मोटरसाइकलको तीव्र गतिलाई दुर्घटनाको कारण मानेको छ ।
घटनास्थल इलाका प्रहरी कार्यालय रानीबाट लगभग २ किलोमिटर उत्तरमा पर्दछ ।
