विराटनगर । ग्रामथान गाउँपालिकाको शारदा सेकेन्डरी बोर्डिङ स्कुलले माध्यमिक शिक्षा परीक्षा (एसइई) मा उच्चतम जिपिएसहित शतप्रतिशत सकारात्मक नतिजा आत्मसात् गरेको छ ।
गत बिहीबार सार्वजनिक भएको नतिजाअनुसार ग्रामथान-२ स्थित शारदा स्कुल उच्चतम् जिपिए ३.९० सहित शतप्रतिशत विद्यार्थी उत्तीर्ण गराउन सफल भएको हो ।
यसपालि १३ जना परीक्षार्थीलेपरीक्षा दिएकोमा नौ जना ए प्लस र चार जनाले ए ग्रेड ल्याई एसइई पास गरेका हुन् ।
विद्यालयले आयोजना गरेको बधाई तथा शुभकामना कार्यक्रममा विद्यालयका अनुशासन समितिका प्रमुख इन्चार्ज रुद्रनारायण चौधरीले शारदाका विद्यार्थीहरू अनुशासनका उदाहरण भएको जिकिर गरे ।
लेखा प्रमुख ऋषिराज दाहाले हालको शारदा स्कुलमा बालमैत्री वातावरणमा विद्यालयको पठनपाठन भएकोले शिक्षण शिकाई अत्यन्त प्रभावकारी भएको बताउँदै अभिभावकले समयमै शुल्क बुझाउँदा शिक्षकले पनि समयमै तलब रकम प्राप्त गर्ने र शिक्षकहरूको मनोबल झन् उच्च हुने बताए ।
नेपाली विषयका शिक्षक, सह-प्रधानाध्यापक तथा युवाकवि उमेश लुइँटेलले विद्यार्थीको मिहिनेत र लगनशीलताले मात्र सफलता सम्भव हुने कुरा बताए ।
विद्यालयका सञ्चालक तथा विद्यालय व्यवस्थापन समितिका अध्यक्ष यादवप्रसाद खतिवडाले अभिभावक, विद्यार्थी र शिक्षहरुको साझा प्रयासले मात्र नतिजा राम्रो भएको बताए ।
प्रधानाध्यापक संजयकुमार मण्डलले बधाई दिँदै विद्यार्थीको उज्वल भविष्यको कामना गरे । शारदा स्कूल परिणाममा भन्दा पनि परिणाममा विश्वास गर्ने भन्दै ग्रामथानबासीको नाताले पनि शैक्षिक क्षेत्रमा व्यापक सुधारका लागि प्रधानाध्यापकले मण्डलले सबैसँग अपिल गरे ।
ग्रामथान र आसपासका क्षेत्रको अधिकतम् जनता मध्यम वर्गीय र कमजोर आर्थिक अवस्थाका रहेका कारण सहरतिर महँगो शुल्क तिरेर छोराछोरी पढाउन नसक्ने भएकोले सोहीअनुरूप सुलभ शुल्कमा विद्यार्थी पढाइरहेको उनले सुनाए ।
विद्यार्थी, अभिभावक, शिक्षक तथा कर्मचारी र सञ्चालकहरूप्रति आभार प्रकट गर्दै अहिले बाल कक्षाहरूमा मन्टेश्वरी विधि, स्मार्ट इन्टर्याक्टिभ बोर्ड, प्रोजेक्टर र स्मार्ट टेलिभिजनहरूको प्रयोग गरी विद्यार्थीहरूलाई सिकाई गराइरहेको प्रिन्सिपल मण्डलको भनाइ छ ।
उनले विद्यालय र अभिभावकहरूले प्रशंसा गरिरहेको शारदा एकेडेमीले नयाँ शैक्षिकसत्रमा थप सेवा र सुविधाहरू विस्तार गर्ने योजना लिएको बताए ।
