विराटनगर । आज असार १५, मानो रोपेर मुरी उब्जाउने मुख्य दिन । यस दिनलाई किसानले अरू पनि विभिन्न रूपमा सम्झिन्छन् । असार १५ मा खेतमा धान रोपाइँ गरेपछि दही चिउरा खाने चलन पनि छ ।
यसै अवसरमा शनिबार रतुवामाई नगरपालिकामा २१ औं राष्ट्रिय धान दिवस मनाइएको छ ।
रतुवामाई–६ केशरबारीमा नेकपा माओवादी केन्द्र रतुवामाई नगर कमिटीको आयोजनामा शनिबार दिउँसो धान दिवस तथा रोपाइँ महोत्सव मनाइएको हो ।
कोशी प्रदेश सरकारका भौतिक पूर्वाधार विकास मन्त्री गणेश उप्रेती ‘सुशील’ को प्रमुख आतिथ्यतामा ‘जलवायु मैत्री कृषि, धान उत्पादनमा वृद्धि’ भन्ने मूल नाराका साथ धान दिवस मनाइएको हो ।
कार्यक्रमलाई सम्बोधन गर्नेक्रममा मन्त्री उप्रेतीले मुलुकमा अन्नबाली आयातमुखी बनेको बताउँदै कृषिलाई आत्मनिर्भर बनाउने विषय राष्ट्रिय चुनौतीका रूपमा रहेको सुनाए ।
जलवायु परिवर्तन, किसान समक्ष उन्नत जात र प्रविधि पहुँच विस्तार नहुँदा उत्पादनको बढाउन झन्–झन् चुनौती थपिँदै गएको उनको भनाइ छ ।
कृषिमा परनिर्भरता बढ्दै गएका कारण उत्पादकत्व बढाउने उद्देश्यले नेपालमा २०६१ देखि असार १५ मा नै राष्ट्रिय धान दिवस मनाउन थालिएको हो ।
