विराटनगर । कोशी प्रदेश सरकारले आगामी आर्थिक वर्ष २०८१-८२ का लागि ल्याएको बजेटमा सहिद तथा बेपत्ता परिवार पनि समेटिएका छन् ।
गत १ गते कोशीका आर्थिक मामिला तथा योजना मन्त्री रामबहादुर मगरले आगामी आर्थिक वर्षका लागि ३५ अर्ब २७ करोड ९३ लाखको बजेट सार्वजनिक गरेका थिए ।
उक्त बजेटअन्तर्गत सिर्जनशील कार्यक्रमका रूपमा यसपालि प्रदेश सरकारले सहिद तथा बेपत्ता परिवारलाई सम्झिएको हो ।
प्रदेशको सरकार भौतिक पूर्वाधार मन्त्रालयले यसपटक सहिद तथा बेपत्ता परिवारको आवास निर्माण सहयोग कार्यक्रमका लागि भन्दै तीन करोड रुपैयाँ विनियोजन गरेको छ ।
भौतिक पूर्वाधार विकास मन्त्री गणेशप्रसाद उप्रेतीले उक्त कार्यक्रमबाट प्रदेशका सबैखाले आन्दोलनमा सहिद तथा बेपत्ता भएकाहरूका परिवारलाई आवास निर्माणका लागि सहयोग गरिने बताए ।
यो कार्यक्रमले इतिहासलाई सम्मान गर्ने उनको भनाइ छ ।
