धरान । सुनसरीको धरानमा धरानमा ट्रकसँग मोटरसाइकल ठोक्किएर भएको दुर्घटनामा एक महिलाको मृत्यु भएको छ ।
सोमबार राति ८:३० बजेतिर धरान उपमहानगरपालिका-१३ शिवधारास्थित कोशी लोकमार्गमा ट्रक र मोटरसाइकल एक-आपसमा ठोक्किएका थिए ।
दक्षिणबाट उत्तरतर्फ जाँदै गरेको प्र१-०२-००१ख ९१९० न. को सिमेन्ट बोकेको ट्रक र विपरीत दिशाबाट आउँदै गरेको प्र१-०२-०४४प ७१०८ नम्बरको मोटरसाइकल एकापसमा ठक्कर खाएका थिए ।
दुर्घटनामा मोटरसाइकलको पछाडि धरान-१९ की ५५ वर्षीया मीना राई गम्भीर घाइते बनेकी थिइन् । उनलाई उपचारका लागि विपी कोइराला स्वास्थ्य विज्ञान प्रतिष्ठान घोपा धरान पठाइएकोमा उपचारका क्रममा ८:५० बजेतिर मृत्यु भएको प्रहरीले जनाएको छ ।
उनका श्रीमान् तथा मोटरसाइकल चालक धरान-१९ का ५४ वर्षीय केदार राई सकुशल रहेको प्रहरीले जनाएको छ ।
इलाका प्रहरी कार्यालय धरानले ट्रक चालक भोजपुरको हतुवागढी गाउँपालिका-५ बस्ने २७ वर्षीय मोहनप्रसाद राईलाई नियन्त्रणमा लिएको छ ।
