विराटनगर । लागुऔषध ओसार पसारविरुद्ध प्रहरीले आक्रामक ढंगले प्रस्तुत हुन थालेको छ ।
केही दिनअघि मोरङको रतुवामाईमा गोली प्रहार गरी लागुऔषध कारोबारीलाई पक्राउ गरेको प्रहरीले बिहीबार साँझ सुनसरीबाट दुई जनालाई नियन्त्रणमा लिएको हो ।
रतुवामाई नगरपालिका-६ मा प्रहरीले गोली चलाएर लागुऔषध कारोबारी भारतीय नागरिक भागिरथ हरिजनलाई नियन्त्रणमा लिएको थियो ।
लागुऔषध नियन्त्रण ब्यूरो काठमाडौंबाट खटिएको प्रहरी नायव निरीक्षक बालकृष्ण सञ्जेल नेतृत्वको टोलीले भारतीय नागरिक हरिजनलाई गोली प्रहार गरी नियन्त्रणमा लिएको थियो ।
हिजो साँझ भने सुनसरीको रामधुनी नगरपालिका-६ इचौलबाट लागुऔषध ओसारपसारमा संलग्न रहेका दुई जनालाई गोली प्रहार गरी प्रहरीले नियन्त्रणमा लिएको हो ।
लागुऔषध ब्राउनसुगरको ओसार पसार भइरहेको भन्ने विशेष सूचनाको आधारमा लागुऔषध नियन्त्रण ब्युरो कोटेश्वर काठमाडौं र इलाका प्रहरी कार्यालय पकली सुनसरीबाट संयुक्त रूपमा खटिएको प्रहरी टोलीले सप्तरीका एक जनालाई पक्राउ गरेको हो ।
सप्तरीको सप्तकोशी नगरपालिका-५ का ३५ वर्षीय श्यामसुन्दर खंग र इटहरी उप-महानगरपालिका-५ का ४० वर्षीय श्यामप्रसाद निरौला पक्राउ परेका हुन् ।
रामधुनी-६ स्थितमा संकास्पद अवस्थामा रहेका उनीहरूलाई चेकजाँच गर्दा प्रहरीमाथि नै आक्रमण गरेपछि प्रहरीले प्रतिकारस्वरूप एक राउण्ड गोली प्रहार गरेको हो ।
खंगको पिडुँलामा लागि घाइते भएको र संलग्न दुवै जनालाई दुई सय १० ग्राम सात ३० मिलिग्राम लागुऔषध ब्राउनसुगरसहित नियन्त्रणमा लिएको हो ।
गोली लागि घाइते भएका खंगको सान्वी सिटी अस्पताल लविपुरमा प्रहरीको निगरानीमा उपचार भइरहेको छ भने घटना सम्बन्धमा जिल्ला प्रहरी कार्यालय सुनसरीबाट थप अनुसन्धान भइरहेको छ ।
