विराटनगर । कोशी प्रदेशमा पर्ने पूर्व-पश्चिम राजमार्गलाई दुई लेनबाट चार लेन बनाउने काम सुरु भएको छ ।
पूर्व-पश्चिम हाइवेअन्तर्गत झापाको काँकरभिट्टाबाट सुनसरीको लौकहीसम्म सडक विस्तारको काम थालिएको हो ।
चार लेन सडक विस्तार गर्ने काम तीन वर्षमा सम्पन्न गर्ने लक्ष्यका साथ एसियाली विकास बैंकको ऋण सहयोगमा थालिएको हो ।
अन्तर्राष्ट्रिय मापदण्डअनुसारको काँकरभिट्टादेखि लौकहीसम्मको १२० किलोमिटर सडक स्तरोन्नति गर्ने तयारी रहेको छ ।
तर, ९७ किलोमिटरका लागि मात्र ठेक्का लागेर काम सुरु भएको छ ।
आयोजनाले यो सडकलाई पूर्वी र पश्चिम खण्ड गरी दुई भागमा विभाजन गरेको छ ।
काँकरभिट्टादेखि सीतापुरसम्मको ४५ किलोमिटर सडक दमकस्थित कार्यालयले हेर्ने छ भने सीतापुरबाट इटहरी पश्चिम पचरुखीसम्मको क्षेत्र इटहरी कार्यालयको कार्यक्षेत्रमा छ ।
पूर्वी खण्डमा २१ वटा पुल रहेका छन् भने १३५ वटा कल्भर्ट बन्ने छन् ।
‘पाइल फाउन्डेसन’ विधिबाट केर्खा खोला र कमल खोलामा पुल निर्माण भइरहेको र ३५ वटा कल्भर्ट निर्माण जारी रहेको आयोजनाका प्रमुख सुनीलबाबु पन्तले जानकारी दिए ।
एसियाली विकास बैंकको सहयोगमा निर्माण सुरु भएको काँकरभिट्टादेखि केर्खासम्मको सडक करिब रु १० अर्बको लगानीमा सम्पन्न हुने गरी ठेक्का सम्झौता गरिएको योजना प्रमुख पन्तले बताए ।
एसिया महादेशका ३२ मुलुकलाई जोड्ने ‘महान एसियाली राजमार्ग’ अन्तर्गत नेपालको एक किलोमिटर भागमा मेची पुल निर्माणसँगै संरचना पूर्णरुपमा निर्माण भइसकेको छ ।
सडक विस्तारको लागि किनारमा पर्ने ११ हजार ५१३ वटा रुखमध्ये ७५ प्रतिशत काटिसकिएको छ । वातावरण प्रभाव मूल्यांकन प्रतिवेदनअनुसार काम भइरहेको आयोजनाले जनाएको छ ।
इटहरीस्थित आयोजना कार्यालयका अनुसार सडक र पुल निर्माणका लागि पाँचवटा अलग–अलग ठेक्का लगाइएको छ ।
