विराटनगर । मोरङको रतुवामाई नगरपालिकामा माटोमुनि गाडेको अवस्थामा खाद्य सामग्री र बीउ-बिजन फेला परेपछि स्थानीय आक्रोशित बनेका छन् ।
नगरपालिकाले कोरोना समयमा विभिन्न दातृ संस्थाले दिएको अनुदानको खाद्य सामग्री, विभिन्न प्रकारका बीउ-बिजन रतुवाखोला किनारमा गाडेको भेटिएको हो।
शुक्रबार स्थानीयले पाएको सूचनाका आधारमा सञ्चारकर्मीलाई लिएर केही सामाजिक अगुवाहरू रतुवामाई–७ को रतुवाखोला किनारमा रहेको डम्पिङ साइडमा उत्खनन् गरेका थिए ।
डम्पिङ साइडको छेउमा झार नउम्रिएको बालुवा भेटिएपछि स्थानीयले सोही ठाउँमा उत्खनन गरेका थिए ।
खनेर हेर्दा क्षेत्रीय कृषि निर्देशनालय विराटनगरले अनुदानमा दिएको गड्यौला मल (भर्मी कम्पोष्ट) भेटिएको थियो ।
२५ केजीको सात बोरा मल भेटिएपछि स्थानीयले जनप्रतिनिधि र प्रहरीलाई खबर गरेका थिए ।
प्रहरी, नगरपालिका प्रमुख प्रशासकीय अधिकृत सञ्जय राजलवट, लेखा अधिकृत रिता सिग्देल, प्रशासन शाखाका अधिकृत नरहरि निरौला र नगर प्रमुख नागेश्वरप्रसाद सिंहसहितको टोली घटनास्थलमा पुगेपछि जेसीवी लगाएर थप उत्खनन गरिएको थियो ।
उत्खनन गर्दा दुई बोरा बीउ-बिजन, थप चार बोरा मल, नून, दुई बोरा, कुहिएको चामल, तेलका पाउच, दाल एक बोरा र सावुन भेटिएको थियो ।
किसानलाई अनुदानमा दिन ल्याएको मल र तरकारीको बीउ बिजन नष्ट भएको देखेपछि स्थानीयले आक्रोश पोखेका हुन् ।
कोभिडका बेला आएको सामान किन वितरण भएन । जिल्लाकै सबैभन्दा बढी ब्यावसायिक तरकारी किसान रहेको पालिकामा तरकारीको बीउ ल्याएर किसानलाई नदिइ खाल्डो खनेर गाड्नु किसानका लागि अपमान भएको स्थानीयको ठहर छ ।
स्थानीयले मरेको पशुपंक्षी गाड्न जेसिबी आयो होला भनेर पहिला वास्ता गरेनन् । तर, जब चामल छरिएको देखेपछि अन्न गाडेको अनुमान लगाए ।
नगरपालिकाका प्रमुख प्रशासकीय अधिकृत सञ्जय राजलवटले अघिल्लो कार्यकालमा आएको सामान वितरण नहुँदै म्याद गुज्रेकोले नष्ट गरिएको बताए ।
नगरपालिकाका कृषि शाखा प्रमुख नरहरि निरौलाले गोदाम खाली गर्ने क्रममा म्याद गुज्रेको केही सामान भेटिएकाले त्यो सामान वितरण गर्नभन्दा नष्ट गर्न उचित ठानेर गाडिएको बताए ।
जिन्सी शाखा प्रमुख महेन्द्र ठाकुरले कति सामग्री नष्ट गरिएको भन्ने जानकारी नरहेको बताए ।
ठाकुरका अनुसार राहत सङ्कलन र वितरणका लागि छुट्टै सर्वदलीय समिति बनाइएको थियो । तर, सामान नष्ट गर्न प्रहरी, सर्वदलीय प्रतिनिधि, वडाध्यक्ष र पत्रकारलाई रोहवरमा राखिएको छैन् ।
प्रशासकीय अधिकृत राजलवटले कति सामग्री नष्ट भयो भन्ने तथ्याङ्क नगरमा नरहेको बताए ।
कृषि शाखा प्रमुख निरौलाले माघ १७ गतेभन्दा अघि ती सामानहरू गाडिएको बताए । तर, स्थानीयले भने २१–२२ दिन अघि गाडिएको दाबी गरेका छन् ।
