झापा । झापामा तस्करले तीन राउन्ड गोली हानेर हात्तीको हत्या गरी दारा र पुच्छरका रौं गायब बनाएका छन् ।
यस्तो घटनामा झापामा पहिलोपटक भएको हो । यसअघि करेन्ट लगाएर र विद्युतीय धरापमा परेर हात्तीहरू मारिने गरे पनि बन्दुकको गोलीले हात्ती मारिएको यो पहिलो घटना भएको जनाइएको छ ।
झापाको मेचीनगर नगरपालिका-११ स्थित कालिका सामुदायिक वनभित्र तस्करले हात्तीलाई गोली हानेर मारी हात्तीका दारा र पुच्छरको रौँ लगेका हुन् ।
मंगलबार दिउँसो करिब ४० वर्ष उमेरको वयस्क हात्ती मृतावस्थामा फेला परेको थियो ।
हात्तीको कानको छेउमा गोली हानेको भेटिएको डिभिजन वन कार्यालय झापाका प्रमुख मेघराज राईले बताए ।
हात्तीको अन्य भागमा गोली नछिर्ने भएकाले कान छेउको भागमा गोली हानेर हात्ती मारिएको हुनसक्ने उनको आँकलन छ ।
कहाँ गोली लाग्छ भनेर थाहा पाउने सिकारीको समूहले तीन राउन्ड गोली हानेको देखिएको उनी बताउँछन् ।
हात्तीको शरीरबाट गोली निकाल्न सकिएको छैन । गोली धेरै भित्र पसेकाले झिक्न नसकिएको हो ।
‘कुन बन्दुकबाट गोली हानिएको थियो भन्ने पत्ता लगाउनका लागि गोली झिक्न सक्नुपर्छ तर सकिएन,’ उनले भने, ‘हात्तीको हड्डी दरो हुने भएकाले हतपत गोली झिक्न सकिँदैन ।’
हात्ती मारेर आराले दारा काटेको प्रारम्भिक अनुसन्धानमा देखिएको पनि प्रमुख राईले बताए ।
हात्तीको दारा र पुच्छर महँगो मूल्यमा बिक्री हुने भएपछि तस्कर समूहले पहिलो पटक झापामा यस प्रकारको घटना घटाएको डिभिजन वन कार्यालय झापाको भनाइ छ ।
यसले यहाँ रहेका हात्तीहरू असुरक्षित रहेको पाइएको छ । झापाका जंगलहरूमा केही समययता धेरैको सङ्ख्यामा हात्तीहरू रहेका छन् ।
हात्तीलाई गोली हानेर मारिएको घटना जघन्य अपराध भएको भन्दै मेची चरा तथा वन्यजन्तु संरक्षण समाजले तत्काल घटनाको विषयमा छानबिन गरेर दोषीलाई पक्राउ गरेर कारबाही गर्न अनुरोध गरेको छ ।