विराटनगर । संखुवासभाको खाँदबारी नगरपालिकामा प्रेमिकाको हत्या गरेको आरोपमा प्रेमी पक्राउ परेका छन् ।
पक्राउ पर्नेमा खाँदवारी नगरपालिका-११ घर भई खाँदवारी नगरपालिका-७ मा डेरा गरी बस्दै आएका ३१ बर्षीय मंंसिरे शेर्पा रहेका छन् ।
आफ्नी प्रेमिका बिनाकुमारी राईको हत्या गरेको आरोपमा प्रहरीले उनलाई पक्राउ गरेको हो ।
सिलिचोङ गाउँपालिका-२ घर भएकी २६ वर्षीय बिना केही समययता शेर्पासँग लिभिङ टुगेदरमा बस्दै आएकी थिइन् ।
उनीहरुबीच फागुन १८ गते घरायसी विषयमा विवाद भएको थियो । विवादका क्रममा रिसको आवेगमा आएर शेर्पाले राईलाई जथाभावी कुटपिट गरेका थिए ।
जसबाट उनको घटनास्थलमा नै मृत्यु भएको थियो ।
बिनाको शव छोडेर मंसिरे फरार बनेका थिए ।
घटनाको जानकारी पाएलगत्तै घटनास्थलमा खटिएको प्रहरी टोलीले आरोपित शेर्पाको खोजतलास थालेको थियो ।
खोजी गर्ने क्रममा एक सातापछि फागुन २४ गते संखुवासभा नगरपालिका-७ को एक घरमा लुकिछिपी बसेको अवस्थामा उनी पक्राउ परेका हुन् ।
हत्या आरोपमा पक्राउ परेका शेर्पाको सम्बन्धमा प्रहरी थप अनुसन्धान गरिरहेको छ ।
