विराटनगर । मोरङको रंगेली नगरपालिस्थित नगर अस्पतालको आइसियू उद्घाटन भएको छ ।
बुधबार एक कार्यक्रमको आयोजना गरी नगरप्रमुख दिलीपकुमार अग्रवाल, नगरउपप्रमुख भूमा पराजुलीले आइसियूको उद्घाटन गरेका हुन् ।
आइसियूका अलावा अस्पतालको नयाँ भवनमा स्थापित ओपिडी वार्ड, सेवाग्राहीको सहजताका लागि बनाइएको बिलिङ काउन्टर र ड्रेसिङ रूमको पनि आजै उद्घाटन भएको छ ।
आइसियुलगायत सेवाका लागि विराटनगरलगायत अरूतिर जानुपर्ने बाध्यता टार्न भन्दै नगरपालिकाले स्थापना गरेको आइसियु आजबाट सञ्चालनमा आएको हो ।
अब बिरामीहरूले आइसियु सेवाका लागि नगरबाहिर जानुपर्ने बाध्यता टर्नेमा आफूहरू विश्वस्त रहेको अस्पतालका मेडिकल सुपरिटेन्डेन्ट डा. वसन्त शाहले बताए ।
नगरभित्र २२ सय जनालाई बिमा गरिदिएर नगरपालिकाले यहाँका बिरामीहरूलाई उपचार सेवा दिइरहेको छ ।
नगरपालिकाले सञ्चालन गर्न थालेपछि रंगेली अस्पतालले अत्याधुनिक स्वास्थ्य उपकरण र विशेषज्ञ चिकित्सकहरूको सहायतामा भरपर्दो सेवा पनि दिइरहेको स्थानीय समाजसेवी सुरेश मिश्रले सुनाए ।
संघीयतायता नगरले आफ्नै मातहतमा राखेर अस्पताल सञ्चालनमा ल्याएपछि यहाँ छिमेकी पालिकाहरूदेखि भारतसम्मका बिरामीले उपचार सेवा लिइरहेका छन् ।
आइसियू सञ्चालनमा आएपछि यस नगर अस्पतालबाट सेवा लिनेहरू थप लाभान्वित हुने स्थानीय समाजसेवी बताउँछन् ।
कार्यक्रममा बोल्दै रंगेली उपप्रमुख भूमा पराजुलीले सदरमुकामसँगै सारिएको जिल्ला अस्पताल फर्काउन नसकिए पनि नगरको पहलमा जिल्ला अस्पतालसहर नगर अस्पतालले सेवा दिइरहेको बताइन् ।
नगप्रमुख दिलीपकुमार अग्रवालले नगरभित्रका नौवटै वडामा बिमा कार्यक्रम लागू गरेको बताउँदै नगरबासीले विश्वस्त भएर सरकारी स्वास्थ्य संस्थामा उपचार गराउन आग्रह गरे ।
जेष्ठ नागरिक–अपांगता भएका बिरामीलाई निःशुल्कै बिमा गरिदिएको उल्लेख गर्दै नगरबासीलाई स्वास्थ्यको पहुँचमा ल्याउने काममा आफूहरू अग्रसर भएको सुनाए ।
स्थानीय तहको स्वास्थ्य सेवामा विश्वसनीयता थप्न नगरले स्वास्थ्य संस्थाको भौतिक विकासमा मात्र जोड दिएको छैन, अत्याधुनिक स्वास्थ्य उपकरण र विशेषज्ञ चिकित्सकहरूको सहायतामा भरपर्दो सेवा पनि दिइरहेको छ ।
अझ, रंगेलीसँगै जोडिएको कानेपोखरीको दक्षिणी भेग, सुनवर्षी नगरपालिका, रतुवामाई नगरपालिका, धनपालथान गाउँपालिकासम्मका बिरामीलाई स्वास्थ्य सेवा उपलब्ध गराउनुलाई महत्वपूर्ण उपलब्धि मान्न सकिन्छ ।
साथै, रंगेलीका सरकारी स्वास्थ्य संस्थाले छिमेकी मुलुक भारतबाट आउने बिरामीलाई पनि स्वास्थ्योपचार सेवा दिइरहेको छ ।
