विराटनगर । मोरङको पथरीशनिश्चरे नगरपालिकामा शौचालय गएकी १५ वर्षीया बालिकाको हत्या गरेको आरोपमा एक जनालाई पक्राउ गरेको छ ।
सोमबार राति पथरीशनिश्चरे नगरपालिका-७ लामा टोलीस्थित मामाको छोरा (दाजु) को घरमा बस्दै आएकी ज्ञानमति थुलुङ राईको निर्मम तरिकाले हत्या भएको थियो ।
हत्या आरोपमा माेरङकाे ग्रामथान गाउँपालिका-४ का ३८ वर्षीय धीरेन चौधरीलाई मंगलबार दिउँसो पक्राउ गरिएको मोरङ प्रहरीले जनाएको छ ।
राईको घर खोटाङको ऐँसेलुखर्क गाउँपालिका-६ सल्ले हो । तर, उनी दाजु विनोद राईको घरमा दुई वर्षदेखि बस्दै आएकी थिइन् ।
उनी पथरीशनिश्चरे–१ मा रहेको पञ्चायत माध्यमिक विद्यालयको कक्षा ७ मा अध्ययनरत थिइन् ।
विनोदले आफ्नो घरमा सुम्निमा होटल नामको खाजा नास्ता पसल सञ्चालन गरेका छन् ।
बुबा दानबहादुर राईको निधनपछि ज्ञानमति सोही नास्ता पसलमा दाजुलाई सहयोग गर्दै बस्ने गरेकी थिइन् ।
गए राति सुत्नुअघि शौचालय जाने क्रममा बसेकै घरको कम्पाउन्डमा धीरेनले धारिलो हतियार प्रहार गरेर बालिकाको विभत्स तरिकाले हत्या गरेका हुन् ।
हत्यापछि फरार बनेका उनलाई बेलबारीस्थित भाउन्नेकाे जंगलबाट पक्राउ गरिएकाे डिएसपी दाहालले जानकारी दिए ।
धीरेनले घटनामा आफ्नाे संलग्नता स्वीकार गरिसकेकाे प्रहरीले जनाएकाे छ ।
