विराटनगर । खोटाङमा टिपरको ठक्करबाट मोटरसाइकल चालकको ज्यान गएको छ ।
मृत्यु हुनेमा खोटाङको हलेसी तुवाचुङ नगरपालिका-६ मंगलटार बस्ने अन्दाजी २५ वर्षीय टंकल राई रहेका छन् ।
आइतबार बिहान १० बजेतिर हलेसी तुवाचुङ नगरपालिका-१० कामिडाँडास्थित मध्य पहाडी लोकमार्गमा नुनथलाबाट हलेसीतर्फ जाँदै गरेको बा.प्र. ०१-००६ ख २४०२ नम्बरको टिपरको ठक्करबाट राईको मृत्यु भएको हो ।
सो टिपरले विपरीत दिशाबाट आउँदै गरेको स ९ प १२१२ नम्बर मोटरसाइकललाई ठक्कर दिएको थियो ।
दुर्घटनामा मोटरसाइकल चालक राईको घटनास्थलमै मृत्यु भएको प्रहरीले जनाएको छ ।
इलाका प्रहरी कार्यालय, हलेसी खोटाङले टिपर र टिपर चालक उदयपुर कटारी नगरपालिका-३ ठानाचोक बस्ने ४३ वर्षीय पदमकुमार कार्कीलाई नियन्त्रणमा लिएको छ ।
टिपरको लापरबाहीका कारण दुर्घटना भएको प्रहरीको प्रारम्भिक अनुसन्धानबाट खुलेको छ ।
