विराटनगर : विराटनगर–धरान सडक खण्डअन्तर्गत सुनसरीको दुहबीमा सडक विस्तार गर्न नदिन स्थानीय सत्याग्रह बसेका छन् ।
व्यापारिक मार्ग विस्तार आयोजनाअन्तर्गत चीन र भारत जोड्ने सोझो ‘लिङ्क’ रोडको दुहबीमा सडक विस्तार गर्न नदिन शुक्रबार स्थानीय एकदिने सत्याग्रहमा बसेका हुन् ।
‘दुहबी बजार बचाऔं’ संयुक्त संघर्ष समिति नाम दिएर आन्दोलन थालेका स्थानीय आज दिनभर सत्याग्रहमा बसेका थिए, जसमा संघीय सांसद भगवती चौधरी पनि सहभागी थिइन् ।
उनीहरूले सर्वोच्च अदालतद्वारा जारी अन्तरिम आदेशको पालना र अक्षरशः कार्यान्वयन गर्न–गराउन दबाब दिने उद्देश्यले आफूहरू सत्याग्रहमा बसेको बताएका छन् ।
दुहबीमा सरकारले २०५४ साल चैत ३ गते राजपत्रमा सूचना प्रकाशित गरी ६३० मिटर क्षेत्रलाई बिल्टअप क्षेत्रका रूपमा कायम गर्ने निर्णय गरेको थियो ।
त्यसबेला दुहबी बजार क्षेत्रमा सीमा सडकको केन्द्र रेखादेखि दायाँबायाँ दुवैतर्फ २७–२७ फिट मात्र कायम गरिएको थियो ।
तर, त्यसो गर्दा आफ्नो धेरै जग्गामा क्षति पुग्ने जनाउँदै स्थानीयले विरोधको पहिलो चरणमा सत्याग्रह बसेका हुन् ।
सडक विस्तार गर्दा सरकारले स्थानीयसँग वार्ता गरी मुआब्जा दिएमा मात्र सडक विस्तार सम्भव हुने उनीहरूको माग छ ।
स्थानीयको दाबीअनुसार अब सडक विस्तार गरेको खण्डमा एक सय ५० भन्दा बढी परिवारको जग्गा पर्ने छ ।
यता, दुहबी नगरपालिकाका मेयर वेदनारायण गच्छदारले सडक विस्तार हुन नदिनु विकासविरोधी कार्य भएको जनाए ।
