विराटनगर । मोरङको बेलबारी नगरपालिका–१ स्थित पूर्व–पश्चिम लोकमार्गमा शुक्रबार बिहान भएको सवारी दुर्घटनामा परेर तीन जनाको मृत्यु भएको छ ।
पश्चिमबाट पूर्वतर्फ जाँदै गरेको प्रदेश १ -०२-००१ ख ९६७६ नम्बरको टिपरले विपरीत दिशाबाट आउँदै गरेको बाग्मती प्रदेश ०३-००१ ख २७१८ नम्बरको बसलाई ठक्कर दिएको थियो ।
उक्त टिपर अनियन्त्रित भई सोही दिशातर्फ आउँदै गरेको मे १ ज २८५६ नम्बरको बोलेरोलाई ठक्कर दिई दुर्घटना भएको थियो ।
जसमा झापाको कमल गाउँपालिका–२ का ५२ वर्षीय यदुकान्त भट्टराई, कमल गाउँपालिका–४ की ४४ वर्षीया दीपा खानाल र झापाको बिर्तामोड नगरपालिका–२ का ३६ वर्षीय कृष्ण गजुरेलको मृत्यु भएको प्रहरीले जनाएको छ ।
प्रहरीका अनुसार यदुकान्त र दीपाको विराटनगरस्थित कोशी अस्पतालमा मृत्यु भएको हो । उनीहरूलाई अस्पताल पुर्याउनासाथ चिकित्सकले मृत घोषणा गरेका थिए ।
कृष्णको उपचारका क्रममा बिहान ८ः५५ बजे न्युरो अस्पताल, विराटनगरमा मृत्यु भएको हो ।
सो दुर्घटनामा परी अरू दुई जना घाइते भएका छन् ।
कमल गाउँपालिका–४ का ४६ वर्षीय हरि खनाल र कमल–२ की ४८ वर्षीया गायत्री भट्टराईको न्युरो अस्पतालमा उपचार भइरहेको छ ।
घाइतेमध्ये हरिको अवस्था गम्भीर र गायत्रीको अवस्था सामान्य रहेको प्रहरीले जनाएको छ ।
आज बिहान ६ः३० बजेतिर प्रहरीका अनुसार टिपर, बस र बोलेरो जप ठोक्किएर दुर्घटना भएको हो ।
प्रहरीका अनुसार मृतक र घाइते ५ जना नै बोलेरो जिपमा सवार थिए ।
प्रहरीका अनुसार घाइते हरि मृतक दीपाका पति (श्रीमान) हुन् भने घाइते गायत्री मृतक यदुकान्तकी पत्नी (श्रीमती) हुन् ।
मृतकमध्ये कृष्ण बोलेरो चालक रहेको जानकारी प्रहरीले दिएको छ ।
दुर्घटनामा परेर बोलेरो जीप पूर्णरूपले क्षतिग्रस्त बनेको छ । टिपरको अगाडिको भागमा पनि क्षति पुगेको छ ।
काठमाडौं जाँदै गरेको सो बसको भने पछाडिको भागमा सामान्य क्षति पुगेको प्रहरीले जनाएको छ ।
बसमा सवार सबै जना सकुसल रहेको प्रहरीको भनाइ छ । प्रहरीका अनुसार दुर्घटनामा परेका सवारीसाधनलाई जेसिबीको प्रयोग गरेर सडकबाट हटाइएको छ ।
दुर्घटनालगत्तै इलाका प्रहरी कार्यालय बेलबारीले टिपर तथा चालक मोरङको सुन्दरहरैंचा नगरपालिका–७ का २३ वर्षीय चन्द्रबहादुर विक र बस तथा चालक सुन्दरहरैंचा–१२ का ४५ वर्षीय छत्रकुमार मास्केलाई नियन्त्रणमा लिएको छ ।
बेलबारी प्रहरीका इन्सपेक्टर तेजबहादुर दाहाल नेतृत्वको टोलीले घटनाको अनुसन्धान सुरु गरेको छ ।
