विराटनगर । सुनसरीको इटहरी उपमहानगरपालिका-४ स्थित बूढीगंगा जमुना मुक्तिघाटमा विद्युतीय शवदाहगृह बन्ने भएको छ ।
इटहरी उपमहानगर र कोशी प्रदेश सरकारको साझेदारीमा तीन करोड ५० लाख रुपैयाँ लागतमा विद्युतीय शवदाहगृह बन्न आँटेको हो ।
कोशी प्रदेश सरकारले ७० प्रतिशत र इटहरी उपमहानगरले ३० प्रतिशत लगानी गर्ने समझदारी भएको बताइएको छ ।
कोशी प्रदेशमै पहिलोपटक इटहरीमा विद्युतीय शवदाह गृह बन्नेगरी बिहीबार प्रदेशको पर्यटन, वन तथा वातावरण मन्त्री गणेश उप्रेती र इटहरी उपमहानगर प्रमुख हेमकर्ण पौडेलबीच छलफल भएको हो ।
सो छलफलले अत्याधुनिक विद्युतीय शवदाहगृह यसै आर्थिक वर्षमा निर्माण सम्पन्न गर्नेगरी काम सुरु गर्ने निर्णय भएको हो ।
विपन्न तथा गरिबहरूलाई दाउरा महँगो पर्ने र समय पनि धेरै लाग्ने भएपछि विद्यतीय दाहसंस्कारस्थल बनाउन लागेको उपमहानगर प्रमुख पौडेलले जनाए ।
दाउराले जलाउँदा दुई तीन घण्टा लाग्ने भए पनि यसमा भने दाहसंस्कार सुरु गरेको ४५ देखि ६० मिनेटसम्ममा शव जलिसक्ने छ ।
विद्युतीय शवदाहको सञ्चालन तथा व्यवस्थापन इटहरी उपमहानगरले नै गर्ने छ । अहिले इटहरीको बुढी जमुना मुक्ति घाटमा सरदर ५ वटा शवको दाहसंस्कार हुने गरेको छ ।
