विराटनगर । सुनसरीको इटहरी उपमहानगरपालिका-४ स्थित कचना माध्यमिक विद्यालयको नवनिर्मित भवन उद्घाटन गर्ने कार्यक्रम विवादित बनेको छ ।
नेकपा एमालेका अध्यक्ष केपी शर्मा ओलीले उद्घाटन गर्ने भनिएको विद्यालयको सो भवन कसले उद्घाटन गर्ने भन्ने विवाद चर्किँदा उद्घाटन कार्यक्रम नै स्थगन भएको हो ।
नेकपा एमालेका कार्यकर्ता रहेका विद्यालय व्यवस्थापन समितिका अध्यक्षले ओलीलाई ल्याएर भवन उद्घाटन गर्ने कार्यक्रम राखेपछि उपमहानगरका मेयर हेमकर्ण पौडेलले कार्यक्रम स्थगन गर्ने सूचना निकालेका हुन् ।
मेयर पौडेलले भने तयारी पूरा नभएको भन्दै कार्यक्रम स्थगित भएको विज्ञप्ति जारी गरेका छन् ।
भवन निर्माणको काम सम्पन्न नभएको भन्दै उद्घाटन कार्यक्रम स्थगित गर्न उनले सोमबार पत्र पठाएका थिए ।
तर, विद्यालयको स्थानीय सरकार मातहत सञ्चालन हुने भएपनि मेयरको निर्देशन अवज्ञा गर्दै व्यवस्थापन समितिले कार्यक्रम गरेरै छाड्ने बताएको छ ।
एमालेका नेताहरू पनि कार्यक्रम सम्पन्न हुने भन्दै तयारीमा छन् ।
व्यवस्थापन समितिका अध्यक्ष डिगबहादुर राईले निर्धारित समयमै भवन उद्घाटन हुने र ओलीले नै गर्ने बताएका छन् ।
ओलीबाट भवन उद्घाटन गराउने कार्यक्रमको तयारी गर्न एमाले कोशी प्रदेशका सहइन्चार्ज तथा पूर्वमुख्यमन्त्री शेरधन राईसहितका नेताहरू आइतबार विद्यालयमा पुगेका थिए ।
राजनीतिक प्रतिशोध साँधेर ओलीलाई भवन उद्घाटननमा अवरोध गर्न खोजेको भन्दै एमालेले भवन उद्घाटन नरोकिने बताएको छ ।
मेयर पौडेलले भने पूर्वप्रधानमन्त्री तथा अध्यक्ष ओलीले भवनको उद्घाटन गर्नु गौरवको कुरा भएपनि नगरसँग जोडिएको विषय भएकाले आवश्यक तयारी पूरा गर्न बाँकी भएको जिकिर गरेका छन् ।
इटहरी उपमहानगरपालिकाको नगर गौरवको योजनाअन्तर्गत छात्रावाससहितको सुविधा सम्पन्न विद्यालय भवन निर्माण गरेको हो ।
इटहरी उपमहानगरपाकिाका तत्कालीन नगरप्रमुख द्वारिकलाल चौधरीले भवनको शिलान्यास गरेका थिए ।
इटहरी उपमहानगरपालिकाको पहलमा राष्ट्रिय योजना आयोगमार्फत संघीय सरकारको विशेष अनुदानमा बनेको भवनमा उपमहानगरपालिकाको १० प्रतिशत लगानी रहेको बताइएको छ ।
