विराटनगर । एम्बुलेन्सको प्रयोग गरी लागुऔषध गाँजा ओसारपसार गर्ने एक जनालाई प्रहरीले पक्राउ गरेको छ ।
पक्राउ पर्नेमा विराटनगर महानगरपलिका-८ का ४८ वर्षीय जयदेव चेल रहेका छन् ।
उनलाई धनकुटाको साँगुरीगढी गाउँपालिका-६ भेडेटारबाट शनिबार पक्राउ गरिएको प्रहरीले जनाएको छ ।
कोशी प्रदेश प्रहरी कार्यालयका अनुसार एम्बुलेन्समा गाँजाको ओसारपसार भइरहेको भन्ने विशेष सूचनाको आधारमा उनी पक्राउ परेका हुन् ।
इलाका प्रहरी कार्यालय भेडेटारबाट चेकजाँचमा खटिएको प्रहरी टोलीले धनकुटाबाट धरानतर्फ जाँदै गरेको मे १ च २०३२ नम्बरको एम्बुलेन्सलाई रोकेर चेकजाँच गरेको थियो ।
सो एम्बुलेन्सभित्र लुकाई छिपाई राखेको ५२ केजी गाँजा बरामद भएपछि उनलाई पक्राउ गरिएको प्रहरीले जनाएको छ ।
यस सम्बन्धमा थप अनुसन्धान भइरहेको जिल्ला प्रहरी कार्यालय धनकुटाले जनाएको छ ।
