विराटनगर । मोरङ पथरीशनिश्चरे नगरपालिकामा पथरीमा कारको ठक्करबाट एक जनाको मृत्यु भएको छ ।
शनिबार बेलुका ८:५० बजेतिर पथरीशनिश्चरे-२ स्थित पूर्व-पश्चिम राजमार्गमा पथरीबाट दमकतर्फ जाँदै गरेको प्रदेश १-०१-००१ च ७९६४ नम्बरको कारले पैदल यात्रीलाई ठक्कर दिएको थियो ।
कारको ठक्करबाट गम्भीर घाइते बनेका ती पुरुषलाई उपचारका लागि उर्लाबारीस्थित मदन भण्डारी अस्पताल तथा ट्रमा सेन्टर पुर्याइएको थियो ।
राति ९ बजेतिर उनलाई डाक्टरले मृत घोषणा गरेका थिए ।
मृतकको पहिचान भने खुल्न नसकेको प्रहरीले जनाएको छ । मंगोलियन मुलको जस्तो देखिने अन्दाजी ३५ वर्षीय ती पुरुषको शव अस्पतालमै छ ।
इलाका प्रहरी कार्यालय, पथरीबाट खटिएको प्रहरी टोलीले कार चालक झापाको दमक नगरपालिका-५ बस्ने ४२ वर्षीय घनश्याम रिजाललाई नियन्त्रणमा लिएको छ ।
कार तीव्र गतिमा चलाएका कारण दुर्घटना भएको प्रहरीको प्रारम्भिक अनुसन्धानबाट खुलेको छ ।
