काठमाडौं । फोहोर टिप्ने बाहानामा दिउँसै चोरी गर्ने पाँच जना पक्राउ परेका छन् ।
काठमाडौंको गोकर्णेश्वर नगरपालिका-४ माकलबारीस्थित दिलमाया आलेको घरबाट दिउँसोको समयमा कोही नभएको मौका पारी चोरी गर्ने पाँच जना पक्राउ परेका हुन् ।
काठमाडौँ उपत्यका अपराध अनुसन्धान कार्यालयका प्रवक्ता प्रहरी उपरीक्षक रवीन्द्र रेग्मीका अनुसार उनीहरूले फोहोर टिप्ने बाहानामा दिउँसै चोरी गरेको खुलेको छ ।
घरको ढोका फुटाइ प्रवेश गरेर सुनका विभिन्न गरगहना तथा नगद ६५ लाख रुपैयाँ बराबरको धनमाल चोरी गरेका थिए ।
स्थायी घर भारत भई हाल काठमाडौं बस्दै आएका २६ वर्षीय लक्का भन्ने विकास पोदार काठमाडौंको जडीबुटीबाट पक्राउ परेका थिए ।
उनलाई पक्राउ गरेर अनुसन्धान थालेको प्रहरीले सोमबार बुढानीलकण्ठ नगरपालिका-१० स्थित दिनेश घिमिरेको घरबाट सुन तथा नगद गरेर २५ लाख रुपैयाँ बराबरको धनमाल चोरी गर्नेलाई पनि पक्राउ गरेको थियो ।
यस्तै, गत माघ २८ गते गोकर्णेश्वरमा गीता राईको घरबाट सुन तथा चाँदीका गरगहना तथा नगदसमेत गरेर अन्दाजी चार लाख १० हजार रुपैयाँ बराबरको धनमाल चोरी गर्ने स्थायी घर भारत भएर काठमाडौं बस्ने २८ वर्षीय जितेन्द्र पोदार, २७ वर्षीय भाइलाल पोदार, ४० वर्षीय सन्जय पोदार र ५० वर्षीय मञ्जु पोदारलाई प्रहरीले पक्राउ गरेकाे छ ।
प्रहरीले उनीहरूलाई थप अनुसन्धान तथा कारबाहीका लागि प्रहरी वृत्त, बौद्ध पठाएको छ । उनीहरूबाट सुनका विभिन्न गरगहना र विभिन्न कम्पनीका पाँच थान मोबाइल बरामद गरिएको प्रहरीले जनाएको छ ।
