विराटनगर । मोरङको केराबारी गाउँपालिकामा आमा-छोरीलाई खुकुरी हानेर फरार रहेका एक जनालाई प्रहरीले पक्राउ गरेको छ ।
पक्राउ पर्नेमा लेटाङ नगरपालिका-१ का ५२ वर्षीय नीरकुमार राई रहेको मोरङ प्रहरीका प्रवक्ता प्रहरी नायब उपरीक्षक रञ्जन दाहालले जानकारी दिए ।
डिइएसपी दाहालका अनुसार केराबारी गाउँपालिका-९ बाट उनलाई पेस्तोल र खुकुरीसहित पक्राउ गरिएको हो ।
राईले बिहीबार (आज) बिहान केराबारी-९ भलुवाइकी ५० वर्षीया जमुनादेवी राई र उनकी २५ वर्षीया छोरी रेणुका राईमाथि खुकुरी प्रहार गरी घाइते बनाएका थिए ।
खुकुरी प्रहारबाट टाउको,अनुहारलगायत शरीरका विभिन्न भागमा चोट लागेपछि उनीहरू दुवै जनाकोलाई उपचारका लागि विराटनगरको विराट नर्सिङ होममा भर्ना गरिएको छ ।
खुकुरी हान्ने नीरकुमार जमुनादेवीका भान्जा हुन् । नीरकुमारकी श्रीमतीले दोस्रो बिहे गरेको विषयलाई लिएर दुई पक्षबीच विवाद हुँदा घटना भएको प्रहरीको प्रारम्भिक अनुसन्धानबाट खुलेको छ ।
खुकुरी हानेर भागेका नीरकुमारलाई अस्थायी प्रहरी पोस्ट भलुवाईले राईलाई ४ राउन्ड गोली लोड भएको अटो पेस्तोल एक थान र एक थान नक्कली पेस्तोलसहित पक्राउ गरेको हो ।
इलाका प्रहरी कार्यालय बेलबारीबाट यस विषयमा थप अनुसन्धान भइरहेको छ ।
