काठमाडौं । सवारी पार्किङको ठुलो समस्या रहेको काठमाडौं महानगरपालिकाको मुख्य बजार क्षेत्र न्युरोडको पार्किङ व्यवस्थित गर्न महानगरले दुई साताअघि निर्माणाधीन धरहराको भूमिगत पार्किङ खुला गर्यो ।
महानगरपालिकाले न्युरोडलगायतका क्षेत्रमा जथाभावी रूपमा गरिँदै आएका पार्किङ बन्द गरेर धरहराको भूमिगत पार्किङ खोलेको थियो ।
साघुँरो न्युरोडमा जथाभावी भइरहेको पार्किङ निषेध गरेर महानगरले पुरानो बसपार्कमा बन्दै गरेको काठमाडौं टावरको बहुतले भवनमा पार्किङ गर्न भनेको थियो ।
तर, न्युरोडका व्यवसायीले उक्त पार्किङ क्षेत्र टाढा भएको भन्दै असहमति जनाएपछि महानगरले गत हप्ताबाट धरहराको भूमिगत पार्किङको एक तलामा पार्किङ खुलायो ।
नि:शुल्क रूपमा पार्किङ गर्न सक्नेगरी खुला गरिएको पार्किङबाट सुविधा पुगेको भन्दै धेरैले खुसी पनि व्यक्त गरे ।
तर, एकाएक तगारो बन्यो सहरी विकास मन्त्रालय । उसले सडकबाट पार्किङ हटाएर धरहराको भुइँ तलामा पार्किङ नि:शुल्क गरेको महानगरलाई धरहराबाट निर्माण चलिरहेकाले पार्किङ बन्द गर्नु भन्दै पत्र पठायो ।
निर्माणाधीन संरचनामा पार्किङ खुला गर्न खतरामुक्त नहुने भन्दै मन्त्रालयले गत साता उक्त पार्किङ बन्द गराउन पत्राचार गरेको थियो ।
त्यसयता, राज्यका यी दुई निकायबीच विवाद देखिएको छ ।
मन्त्रालय र निर्माण जिम्मा पाएको निर्माण व्यवसायीसँग समन्वय नै नगरी पार्किङ खुलाएको भन्दै मन्त्रालयले महानगरको ध्यानाकर्षण गराउदै पत्र लेखेपछि बागदरवार भनिने महानगरपालिका र सिंहदरवारबीच विवाद चुलिएको हो ।
मन्त्रालयले धरहराको निर्माण सम्पन्न नभइसकेकाले निःशुल्क पार्किङ रोक्न माघ १४ गते काठमाडौं महानगरपालिकालाई पत्र पठाएको थियो ।
मन्त्रालयको चिठी पाएपछि बालेनले तत्कालीन प्रधानमन्त्री केपी शर्मा ओलीले उद्घाटन गरेको पौने तीन वर्ष बित्दा धरहरा (सेतो टावर) को निर्माण पूरा नभएकोप्रति आक्रोश व्यक्त गरे ।
उनले सामाजिक सञ्जालमा लेखेका छन्, ‘आजभन्दा २ वर्ष ९ महिना २० दिन अगाडि तत्कालीन प्रधानमन्त्री केपी ओलीबाट ‘सेतो टावर’ उदघाटन भयो । राणाकालीन अवस्थामा भएको भए केपी ओली टावर भन्थे । तर केही दिनअगाडि त्यही ठाउँमा सर्वसाधारणका लागि पार्किङ खुला गर्दा पत्र लेखिन्छ, धरहरा निर्माण हुँदै छ । पार्किङ बन्द गर्नू ।’
उनले उद्घाटन गरेको दुई वर्ष नौ महिनापछि पनि बनाएर नसकी महानगरलाई लाज त्यागेर पत्र लेख्नुको औचित्य के हो भनी प्रश्न गरेका छन् ।
महानगरपालिकाले पार्किङ सुरु गरेको धरहरा क्षेत्रको निर्माण मन्त्रालयअन्तर्गतको केन्द्रीय आयोजना कार्यान्वयन इकाईमार्फत भइरहेको छ ।
भूमिगत पार्किङमा भेन्टिलेसन लगायतका सुरक्षासंग जोडिएका महत्त्वपूर्ण काम बाँकी नै भएकाले मानवीय दृष्टिले जोखिमपूर्ण भएको भन्दै पार्किङ स्थगित गर्न पनि मन्त्रालयले भनेको छ ।
मन्त्रालयले तीन महिनाभित्र बाँकी सबै काम सक्ने पनि बताएको छ ।
तर पटकपटक म्याद थपेर पनि काम अलपत्र पारी समस्या बल्झाइरहेको भन्दै महानगरको नेतृत्वले सरकारसँग असन्तुष्टि व्यक्त गरिरहेको छ ।
दुवै निकायका अधिकारीले विवादलाई छलफल र सहमतिबाटै निकास दिएर आमनागरिकलाई सहजता दिन लागिरहेको बताएकाले अब चाँडै निकास निस्कने अपेक्षा भने गर्न सकिन्छ ।
