विराटनगर । मोरङको उर्लाबारी नगरपालिका-७ मा आइतबार भएको दुर्घटनामा परी चार जना घाइते भएका छन् ।
आज दिउँसो पूर्व-पश्चिम लोकमार्गअन्तर्गत उर्लाबारी-७ काे शाखा मावा पुलस्थित दमकबाट उर्लाबारीतर्फ आउँदै गरेका दुई माेटरसाइकल एकआपसमा ठाेक्किएर दुर्घटना थियो ।
११ प ४८६८ नम्बरको मोटरसाइकल र सोही दिशाबाट आउँदै गरेको ३३ प ६२४६ नम्बरको माेटरसाइकल एकआपसमा ठोक्किएर पुलमुनि खसेका थिए ।
दुर्घटनामा ३३ प ६२४६ नम्बरको मोटरसाइकल चालक सुन्दरहरैंचा नगरपालिका-८ सलकपुरका २४ वर्षीय सौगात शिवा र पछाडि सवार सौगात शिवाका बुबा ४६ वर्षीय दिलकुमार शिवा घाइते भएका थिए ।
शरीरको विभिन्न भागमा समान्य चाेटपटक लागेका उनीहरू उपचारपछि डिस्चार्ज भएको इलाका प्रहरी कार्यालय, उर्लाबारीले जनाएको छ ।
यस्तै, ११ प ४८६८ नम्बरको मोटरसाइकलका चालक पथरीशनिश्चरे नगरपालिका-९ का ५० वर्षीय गोपाल तामाङ र पछाडि सवार १६ वर्षीया सञ्जु सुब्बा पनि घाइते भएका थिए ।
शरीरको विभिन्न भागमा चोट लागेका तामाङको उर्लाबारीस्थित अरनिको अस्पतालमा उपचाररत रहेको प्रहरीले जनाएको छ ।
सुब्बा भने उपचारपछि डिस्चार्ज भइसकेकी छन् ।
घटनालगत्तै इलाका प्रहरी कार्यालय उर्लाबारीबाट खटिएको प्रहरी टोलीले उद्दार गरी उपचारका लागि अस्पताल पठाएको थियो ।
साथै, प्रहरीले दुईवटै माेटरसाइकल नियन्त्रणमा लिएकाे छ ।
