काठमाडौं । संस्कृति, पर्यटन तथा नागरिक उड्डयन मन्त्रालयका उपसचिव प्रमोद नेपाल भ्रष्टाचार मुद्दामा दोषी ठहर भएका छन् ।
विशेष अदालतले घुस रकमसहित पक्राउ परेका तत्कालीन उपसचिव नेपाललाई भ्रष्टाचार मुद्दामा दोषी ठहर गरेको हो ।
विशेष अदालतका अध्यक्ष टेकनारायण कुँवरर सदस्यहरू रामबहादुर थापा र मुरारीबाबु श्रेष्ठको इजलासले शुक्रबार उनलाई दोषी ठहर गर्ने फैसला सुनाएको हो ।
अदालतका प्रवक्ता धनबहादुर कार्कीका अनुसार नेपाललाई एक वर्ष कैद सजाय र ६ लाख जरिबाना हुने फैसला सुनाइएको छ ।
नेपालसँगै प्रतिवादी बनाइएका बिबी एयरवेजका तत्कालीन कार्यकारी अधिकृत हरिभक्त श्रेष्ठले भने सफाइ पाएका छन् ।
उपसचिव नेपाललाई गत साउन १७ गते ६ लाख अख्तियार दुरुपयोग अनुसन्धान आयोगको टोलीले घुससहित पक्राउ गरेको थियो ।
काठमाडौंको होटेल अर्यानामा रंगेहात पक्राउ परेका उनको कारबाट स्रोत नखुलेको १६ लाख ५० हजार रुपैयाँ बरामदसमेत भएको थियो ।
प्याराग्लाइडिङ सञ्चालनका लागि अनुमतिपत्र दिने सम्बन्धमा उपसचिव नेपालले घुस लिएको अख्तियारले जनाएको थियो ।
पर्यटन मन्त्रालयमा कार्यरत उपसचिव नेपाल त्रिभुवन विश्वविद्यालयबाट अर्थशास्त्र विषयमा स्नातकोत्तरका ‘गोल्ड मेडलिष्ट’ हुन् ।
