विराटनगर । सत्ता साझेदार राजनीतिक दलका शीर्ष नेताहरूको बैठकले राष्ट्रियसभा निर्वाचनमा कोशी प्रदेशको एक सिटमा आएको परिणाम अप्रत्याशित भएको निष्कर्ष निकालेको छ ।
मंगलबार प्रधानमन्त्री निवास बालुवाटारमा झन्डै चार घण्टा भएको बैठकले यस्तो निष्कर्ष निकालेको नेपाली कांग्रेस संसदीय दलका प्रमुख सचेतक रमेश लेखले जानकारी दिए
उनका अनुसार छलफलमा शीर्ष नेताबीच १९ सिटमध्ये गठबन्धनले एक सिट गुमाएको सन्दर्भमा गम्भीर समीक्षा गरेर अघि बढ्ने समझदारी पनि भएको छ ।
राष्ट्रियसभा निर्वाचनको परिणामका सन्दर्भमा फेरि पनि छलफल गर्ने समझदारी भएको बताउँदै उनले भने, ‘कोशी प्रदेशमा जुन अप्रत्याशित परिणाम आएको छ, यो गम्भीर र चिन्ताजनक छ । अझै छलफल गर्ने निर्णय भएको छ ।’
राष्ट्रियसभा निर्वाचनअन्तर्गत कोशी प्रदेशमा गठबन्धनका तर्फबाट कांग्रेस नेता कृष्णप्रसाद सिटौला र एमाले नेत्री रुक्मिणी कोइराला विजयी भएका थिए ।
जबकि, सत्ता गठबन्धनका साझा उम्मेदवार नेकपा (माओवादी केन्द्र) की नेत्री चम्पादेवी कार्की पराजित भएकी थिइन् ।
