विराटनगर । नेपाली कांग्रेसका कृष्णप्रसाद सिटौलाले कठिन परिस्थितिका बीच राष्ट्रियसभा सदस्य निर्वाचनमा बाजी मारे ।
सत्तारूढ गठबन्धनकै महिला उम्मेदवार पराजित हुने कठिन परिस्थितिबीच सिटौला निर्वाचित हुनुलाई धेरै आश्चर्य मानेका छन् ।
कोशी प्रदेशमा राष्ट्रियसभाको दुई सिटका लागि भएको निर्वाचनमा चार जनाले चुनावी प्रतिस्पर्धा रोजेका थिए । जसमध्ये, कांग्रेसका पूर्वमहामन्त्रीसमेत रहेका सिटौलाले राप्रपााका उद्धव पौडेललाई हराए ।
नेकपा एमालेसँग सहकार्य गरेर राप्रपाले सिटौलालाई रोक्ने दाउ बनाएको थियो । तर, कांग्रेसका नेता–कार्यकर्ताको साथ र गठबन्धन दलहरूको सहयोगमा सिटौला विजयी भएका हुन् ।
माओवादीलाई शान्ति प्रक्रियामा ल्याउन भूमिका निर्वाह गरेका सिटौला करिब एक दशक लगभग शक्तिविहीन थिए । तर, अहिले पुनः सत्ता–शक्तिमा ल्याउन माओवादीलगायत गठबन्धन दलको समर्थन रह्यो ।
कांग्रेस सभापति शेरबहादुर देउवानिकट मानिने सिटौलालाई संस्थापन इतर (डा. शेखर कोइराला) पक्षले उनलाई असहयोग गर्ने शंका थियो ।
तर, सिटौलाले जित्नुपर्छ भनेर सबैबीच भूमिका खेल्नेमध्येका एक हुन्, अभिषेक गिरी ।
गिरीलगायत केही नेताका कारण कोइरालामात्र नभएर कांग्रेसका महामन्त्रीद्वय गगन थापा र विश्वप्रकाश शर्माले खुलेरै समर्थन गरेका थिए । जसका कारण पनि उनको जित सुनिश्चित भयो ।
पछिल्लो समय समाजसेवामा सक्रिय देखिएका गिरीले राष्ट्रियसभा निर्वाचनका बेला गरेको दौडधुपले सिटौलाको जित अझ सहज बनेको बताइन्छ । नेता–कार्यकर्ता सबैलाई मिलाएर सिटौला राष्ट्रियसभा सदस्य बन्ने माहोल बनाउन उनी लागिपरेका थिए ।
गिरि स्वयम् भन्छन्, ‘राम्रो व्यक्तिले राष्ट्रियसभा स्थान पाउनुभएको छ । उहाँलाई हामीले सक्दो सहयोग गरेका हौँ । कठिन अवस्थाकाबीच सबै मिलेर उहाँलाई उकास्यौं । धेरै खुसी छु ।’
