विराटनगर । मोरङको सुन्दरहरैँचा नगरपालिकामा बुधबार राति दुर्घटना हुँदा एक जनाको मृत्यु भएको छ ।
मृत्यु हुनेमा बेलबारी नगरपालिका–२ बस्ने २२ वर्षीय रूपक घिमिरे रहेको राजमार्ग सुरक्षा तथा कोशी प्रदेश ट्राफिक कार्यालय इटहरीले जनाएको छ ।
गएराति १२ः१५ बजेतिर पूर्व–पश्चिम राजमार्गअन्तर्गत सुन्दरहरैँचा–८ पाथीभरा मन्दिर नजिक मोटरसाइकल र स्कारिपयो एक–आपसमा ठोक्किएका थिए ।
बेलबारीबाट इटहरीतर्फ आउँदै गरेको प्रदेश १–०१–००१ च ९६३२ नम्बरको स्कारपियो र इटहरीबाट विराटचोकतिर जाँदै गरेको प्रदेश १–०२–०४६ प २५२ नम्बरको मोटरसाइकल एक–आपसमा जुधेका थिए ।
जसमा मोटरसाइकल चालक घिमिरे टाउकोमा चोट लाग्न गई गम्भीर घाइते भएका थिए । उनको विराटनगरस्थित कोशी अस्पतालमा उपचारका क्रममा राति १ः४५ बजे मृत्यु भएको ट्राफिक प्रहरीले जनाएको छ ।
स्कारपियो चालक झापाको कन्काई नगरपालिका–१ का अन्दाजी ३० वर्षीय रोहित मण्डललाई इलाका प्रहरी कार्यालय विराटचोकले नियन्त्रणमा लिएको छ ।
दुवै साधन तीव्र गतिका कारण दुर्घटना भएको ट्राफिक प्रहरीको प्रारम्भिक निष्कर्ष छ। यस विषयमा थप अनुसन्धान भइरहेको प्रहरीले जनाएको छ ।
