विराटनगर । कोसी प्रदेशका पर्यटन, वन तथा वातावरणमन्त्री गणेश उप्रेती ‘सुशील’ ले आफ्नो सम्पत्ति विवरण सार्वजनिक गरेका छन् ।
नेकपा माओवादी केन्द्रबाट कोसी प्रदेशसभा सदस्यमा निर्वाचित भइ मन्त्री बनेका उप्रेतीले बुधबार आफ्नो सम्पत्ति विवरण सार्वजनिक गरेका हुन् ।
मोरङ क्षेत्र नम्बर २ (१) बाट निर्वाचित भएका उप्रेती गत कात्तिक १७ गते मन्त्री बनेका हुन् ।
उनले सार्वजनिक गरेको सम्पत्ति विवरणमा श्रीमती नरमाया भट्टराईको नाममा विराटनगरमा १ कठ्ठा ५ धूर तथा सुनसरीको इटहरी १० मा ११ धूर जग्गा रहेको उल्लेख छ ।
यस्तै, १० तोला सुन र २० तोला चाँदी तथा विभिन्न बैंकमा परिवारको नाममा दुई लाख ७८ हजार रुपैयाँ नगद रहेको उल्लेख छ ।
उप्रेतीको परिवारको नाममा विभिन्न वित्तीय संस्थामा १ हजार ४५० कित्ता सेयर रहेको विवरणमा उल्लेख छ ।
उनले विभिन्न बैंक तथा वित्तीय संस्थामा ३९ लाख ५० हजार ऋण तिर्न बाँकी रहेको देखाएका छन् ।
उनको एउटा होन्डा मोटरसाइकल र सुजुकी ब्रान्डको स्कुटर रहेको विवरणमा उल्लेख छ ।
यस्तै उनले सामूहिक रूपमा कृषि फारम तथा गाई फारम सञ्चालन गरिरहेको जनाएका छन् ।
