फिदिम । पाँचथरको मिक्लाजुङ गाँउपालिकामा बिहीबार एक महिलाको हत्या भएको छ ।
मिक्लाजुङ-३ आरुबोटेमा धारिलो हतियार प्रहार गरी स्थानीय असफल कुरुम्बाङले आफ्नी श्रीमती गोमा फियाकको हत्या भएको प्रहरीले जनाएको छ ।
पाँचथर प्रहरी निरीक्षक सुमित कुश्वाहाका अनुसार बिहीबार साँझ ८ बजे तुम्वेवा-४ स्थित घरबाट आरुबोटेमा रहेको ससुराली घर पुगेका ३५ वर्षीय असफलले श्रीमतीको हत्या गरेका हुन् ।
उक्त घटनामा दुई जना घाइते भएका छन् । महेन्द्र श्रेष्ठ र कान्छीमाया फियाक घाइते भएका छन् । कान्छीमाया असफलकी सासू हुन् भने महेन्द्र छिमेकी हुन् ।
घाइतेहरूलाई उपचारका लागि झापा पठाइएको वडाध्यक्ष जीवन फियाकले जानकारी दिए ।
हत्यामा संलग्न असफल भने फरार रहेको प्रहरीले जनाएको छ । घटनास्थलमा प्रहरी जाँदै गरेकाले विस्तृत विवरण आउने प्रहरी निरीक्षक कुश्वाहाले जानकारी दिए ।
पारिवारीक समस्या भएपछि मिलाउन बसेको बेला असफलले श्रीमतीको हत्या गरेका हुन् ।
पाँच वर्षअघि सोही ठाउँमा यस्तै प्रकृतिको घटना हुँदा नौ जनाको हत्या भएको थियो । त्यसबेला ज्वाईंले ससुराली र आफन्तको हत्या गरी आत्माहत्या गरेका थिए ।
