बाघको आक्रमणबाट सासु-बुहारीसहित तीन जनाको मृत्यु

विराटनगर । नवलपुर र पर्सामा गरी बाघको आक्रमणबाट सासु-बुहारीसहित तीन जनाको मृत्यु भएको छ ।

नवलपुर जिल्लाको विनयी त्रिवेणी गाउँपालिकामा बाघको आक्रमणबाट ज्यान गुमाएका दुई जनाको शव फेला परेको छ ।

यस्तै, पर्साको पटेर्वासुगौली गाउँपालिकामा बाघको आक्रमणबाट मृत्यु भएका एक युवकको शव भेटिएको छ ।

सोमबार दुवै स्थानमा बाघको आक्रमणमा परी ज्यान गुमाउने तीन जनाको शव फेला परेको हो ।

आइतबार दिउँसो घाँस काट्नसँगै निस्केका सासु-बुहारीको आज (सोमबार) क्षतविक्षत अवस्थामा शव फेला परेको नवलपरासी पूर्वको प्रहरी कार्यालयले जनाएको छ ।

जिल्ला प्रहरी कार्यालय नवलपसारी पूर्वका प्रहरी उपरीक्षक नरहरि रेग्मीका अनुसार बाघको आक्रमणबाट विनयी त्रिवेणी गाउँपालिका–१ को खहरे जङ्गलमा स्थानीय ५९ वर्षीय मनादेवी पौडेल र २९ वर्षीय विष्णु पौडेलको ज्यान गएको हो ।

आइतबार साँझसम्म पनि घर नफर्केपछि परिवारले स्थानीयको सहयोगमा नजिकको जङ्गलमा खोजतलाश गर्दा दुवैको शव क्षतविक्षत भएको अवस्थामा फेला पारेको हो ।

मृतक दुवै जनाको कम्परा र पछाडिपट्टि ढाडमा चोट रहेकाले बाघले आक्रमण गरेको र शवको पोष्टमार्टमका लागि जिल्ला अस्पताल मध्यबिन्दु पठाइएको प्रहरी नायब उपरीक्षक बेदबहादुर पौडेलले बताए ।

यसैगरी, पर्साको पटेर्वासुगौली गाउँपालिका– २ थरुहटीका ३२ वर्षीय मनोज राउतको बाघको आक्रमणमा परेर मृत्यु भएको छ।

गाउँभन्दा करिब दुई सय मिटर उत्तर जङ्गलको खाली जग्गामा शौच गर्न गएका राउत सोमबार बिहान मृत फेला परेका हुन्।

आइतबार राति शौच गर्न गाउँनजिकको जङ्गलमा गएका ढागड बिहान मृत फेला परेको इलाका प्रहरी कार्यालय पटेर्वासुगौलीका प्रहरी निरीक्षक रामराजा केशरीले बताए ।

उनका अनुसार शौच गर्न गएका व्यक्ति राति घर नफर्किएपछि सोमबार बिहान खोज्न निस्किएकाहरूले रगत र मोबाइल देखेपछि प्रहरी र वनका कर्मचारीलाई खबर गरेका थिए।

आक्रमण गरी घटनास्थलबाट भित्र जङ्गलतर्फ लगेको बाटोभरि रगत लागेको फेला परेको प्रहरी निरीक्षक केशरीले बताए ।