काठमाडौं । अमेरिकी राष्ट्रपति डोनाल्ड ट्रम्पको प्रशासनले इरानविरुद्ध सम्भावित ठूलो सैन्य कारबाहीको तयारी तीव्र बनाएको छ। अमेरिकी सञ्चारमाध्यम एक्सियोसका अनुसार अमेरिकाले इजरायलमा दर्जनौं थप हवाई इन्धन भर्ने (रिफ्युलिङ) विमान पठाउने तयारी गरेको छ। तीन जना अमेरिकी तथा इजरायली अधिकारीहरूले यसको पुष्टि गरेका छन्।
रिपोर्टअनुसार राष्ट्रपति ट्रम्पले ‘सिचुएसन रुम’मा इरानसँग सम्बन्धित नयाँ सैन्य योजनाको समीक्षा गरेका छन्। हाल हर्मोज स्ट्रेट क्षेत्रमा भइरहेका सीमित आक्रमणभन्दा धेरै ठूलो सैन्य अभियान सञ्चालन गर्ने विकल्पमाथि छलफल भइरहेको जनाइएको छ।
अमेरिकी प्रशासनले इरानका ऊर्जा पूर्वाधार, रणनीतिक केन्द्र तथा आणविक फ्यासिलिटीलाई लक्षित गर्दै बमबारी गर्ने सम्भावित योजनामाथि समेत विचार गरिरहेको छ। यद्यपि ट्रम्पले सैन्य कारबाहीबारे अन्तिम निर्णय भने अझै गरेका छैनन्।
अमेरिकी तथा इजरायली अधिकारीहरूका अनुसार इरानलाई हर्मोज स्ट्रेट खुला राख्न र आणविक कार्यक्रमसम्बन्धी अमेरिकी माग स्वीकार गर्न दबाब दिन ट्रम्प प्रशासन युद्धको दायरा विस्तार गर्न तयार देखिएको छ। आवश्यक परे आगामी केही दिनमै नयाँ सैन्य आदेश जारी हुन सक्ने जनाइएको छ।
यसैबीच अमेरिकी सेनाले लगातार पाँचौं दिन पनि हर्मोज स्ट्रेट र इरानको दक्षिणी तटीय क्षेत्रमा आक्रमण जारी राखेको छ। बन्दर अब्बास सहर आसपास रहेका कम्तीमा सातवटा पुलमा बमबारी गरिएको बताइएको छ। उक्त क्षेत्रलाई इरानी रिभोल्युसनरी गार्ड कर्प्स (आईआरजीसी) को प्रमुख सैन्य केन्द्र मानिन्छ।
इरानले पनि जोर्डन, कतार, बहराइन, इराक र कुवेतस्थित अमेरिकी सैन्य अड्डाहरूमा आक्रमण तीव्र बनाएको दाबी गरेको छ। आईआरजीसीले सिरियास्थित अमेरिकी बेसमा पनि आक्रमण गरेको जनाएको भए पनि अमेरिकी सेनाले उक्त बेस केही महिनाअघि नै खाली गरिसकेको जनाएको छ।
हाल तेल अभिभस्थित बेन गुरियन अन्तर्राष्ट्रिय विमानस्थल र दक्षिणी इजरायलको रमोन विमानस्थलमा अमेरिकाका करिब ६० वटा रिफ्युलिङ विमान तैनाथ छन्। इजरायली अधिकारीहरूका अनुसार थप विमान पुगेमा युद्धको सुरुवाती चरणमा जत्तिकै अमेरिकी हवाई क्षमता पुनः विस्तार हुनेछ।
अमेरिकी सेनाले यी विमानहरू मुख्यतः बेन गुरियन विमानस्थलबाट सञ्चालन गर्ने योजना बनाएको छ। अन्य हवाई अड्डा इरानी आक्रमणको जोखिममा रहेकाले उक्त विमानस्थललाई तुलनात्मक रूपमा सुरक्षित मानिएको छ।
यता इजरायली प्रधानमन्त्री बेन्जामिन नेतान्याहुले इरानलाई कडा चेतावनी दिँदै इजरायलमाथि कुनै पनि आक्रमण भए त्यसको जवाफ विगतभन्दा अझ शक्तिशाली हुने बताएका छन्।
यद्यपि अमेरिकी सैन्य विमानहरूको बढ्दो उपस्थितिले इजरायलभित्र राजनीतिक विवाद पनि सिर्जना गरेको छ। लामो समयदेखि बेन गुरियन विमानस्थलमा सैन्य विमान पार्क गरिएकाले नागरिक उडान प्रभावित भएका छन्। गर्मीयामको बिदाका कारण यात्रुको चाप बढिरहेका बेला थप विमान आए धेरै उडान रद्द हुन सक्ने चिन्ता व्यक्त गरिएको छ।
चुनाव आउन करिब तीन महिना बाँकी रहेकाले यसले प्रधानमन्त्री नेतान्याहुको गठबन्धनमाथि राजनीतिक दबाब बढाउन सक्ने विश्लेषण गरिएको छ। यातायात मन्त्री मिरी रेगेभले अमेरिकी विमानको संख्या सीमित गर्न वा अन्यत्र सार्न आग्रह गरेकी छन्। तर रक्षा मन्त्रालय र इजरायली सेनाले त्यसको विरोध गरेका छन्। ट्रम्प प्रशासनले भने थप विमान व्यवस्थापन गर्न इजरायल सरकारसँग समन्वय गरिरहेको छ। अन्तिम निर्णय प्रधानमन्त्री नेतान्याहुले गर्ने जनाइएको छ।
