विराटनगर । कोशी प्रदेश सरकारले प्रदेशको रैथाने उत्पादनलाई प्रोत्साहन गर्ने गरी कर्मचारीहरूलाई प्रदान गरिने पोसाक भत्ता कार्यान्वयनमा ल्याएको छ ।
प्रदेश सरकारले कोशी प्रदेशमै उत्पादित ढाका, खाँडी, अल्लो तथा अन्य कपडाबाट निर्मित कार्यालय पोसाक अनिवार्य रूपमा प्रयोग गर्न कर्मचारीहरूलाई निर्देशन दिएको छ ।
प्रत्येक हप्ताको बुधबार र शुक्रबार यो व्यवस्था लागु गरिएको मुख्यमन्त्री तथा मन्त्रीपरिषद्को कार्यालयले जनाएको छ ।
सोही निर्णयअनुसार सामाजिक विकास मन्त्रालयका कर्मचारीहरूले आजैदेखि स्थानीय उत्पादनबाट बनेको पोसाक लगाउन सुरु गरेका छन् ।
साताको दुई दिन स्थानीय उत्पादनको पोसाक लगाउनुपर्ने व्यवस्थाका लागि सरकारले नियमित रूपमा प्रदान गर्दै आएको पोसाक भत्तामा प्रतिव्यक्ति वार्षिक पाँच हजार पाँच सय रुपियाँ थप गरी विशेष पोसाक सुविधा उपलब्ध गराएको छ ।
मुख्यमन्त्री हिक्मतकुमार कार्कीले आगामी आर्थिक वर्षदेखि कोशी प्रदेशका स्थानीय तहहरूले पनि यस अभियानमा सहभागी हुन चाहेमा प्रदेश सरकारले लागत साझेदारी गर्ने नीति तथा आवश्यक बजेटको व्यवस्था गर्ने जानकारी दिए ।
उनका अनुसार यस अभियानले कोशी प्रदेशमा उत्पादित ढाका, खाँडी र अल्लोजस्ता स्थानीय वस्तुको उत्पादन, बजारीकरण तथा प्रयोगलाई प्रोत्साहन गर्ने छ । यसबाट स्थानीय उद्योग र उद्यमीलाई प्रत्यक्ष लाभ पुग्ने विश्वास लिइएको छ ।
हाल कोशी प्रदेश सरकार अन्तर्गत करिब तीन हजार ९६ जना कर्मचारी कार्यरत छन् भने स्वीकृत दरबन्दी चार हजारभन्दा बढी रहेको छ ।
प्रदेश सरकारले कर्मचारीमार्फत स्थानीय उत्पादनको प्रयोग बढाउँदै स्वदेशी उद्योगको प्रवर्धन र प्रदेशको अर्थतन्त्रलाई थप चलायमान बनाउने लक्ष्य लिएको जनाएको छ ।
