काठमाडौं । अमेरिका र इरान बीच हुने भनिएको बहुप्रतीक्षित शान्ति सम्झौता समारोह अनिश्चितकालका लागि स्थगित भएको छ। स्वीट्जरल्यान्डमा शुक्रबार आयोजना हुने तयारी गरिएको उक्त समारोहमा कुनै पनि उच्चस्तरीय अमेरिकी वा इरानी अधिकारी सहभागी नहुने भएपछि कार्यक्रम स्थगित गरिएको अन्तर्राष्ट्रिय सञ्चारमाध्यमहरूले जनाएका छन्।
कूटनीतिक स्रोतहरूका अनुसार अब प्रक्रिया औपचारिक हस्ताक्षरतर्फ नभई प्राविधिक तहका विस्तृत वार्तातर्फ मोडिएको छ। अमेरिका, इरान, कतार र पाकिस्तानका प्रतिनिधिमण्डलहरू हाल स्वीट्जरल्यान्डका विभिन्न स्थानमा बसेर नयाँ वार्ता ढाँचा तयार गर्न जुटिरहेका छन्।
स्रोतका अनुसार सम्झौताका बाँकी रहेका जटिल र प्राविधिक विषयमा सहमति जुटाउन आगामी ६० दिनसम्म विभिन्न चरणमा वार्ता सञ्चालन गरिनेछ। ती छलफलहरूमा सुरक्षा, कार्यान्वयन प्रक्रिया तथा अन्य संवेदनशील विषयहरूलाई अन्तिम रूप दिने प्रयास गरिने बताइएको छ।
सम्झौता प्रक्रियामा आएको यो अप्रत्याशित परिवर्तनले पाकिस्तानको कूटनीतिक कार्यक्रमलाई पनि प्रभावित पारेको छ। शहबाज शरिफ ले आफ्नो स्वीट्जरल्यान्ड भ्रमण रद्द गरेका छन्। स्रोतहरूका अनुसार समझदारीपत्र (एमओयू) सम्बन्धी मुख्य एजेन्डा पूरा भइसकेकाले उनको भ्रमण आवश्यक नरहेको निष्कर्ष निकालिएको हो।
यद्यपि शान्ति सम्झौता तत्काल हुन नसके पनि सम्बन्धित पक्षहरूले वार्ता प्रक्रिया जारी राखेकाले भविष्यमा सहमतिको सम्भावना अझै कायम रहेको विश्लेषण गरिएको छ।
