काठमाडौं । इरान र संयुक्त राज्य अमेरिकाबीचको सैन्य तनाव एकाएक उत्कर्षमा पुगेको छ। इरानी सरकारी सञ्चारमाध्यमका अनुसार इरानी इस्लामिक रिभोलुसनरी गार्ड्स कर्प्सले मध्यपूर्व क्षेत्रमा रहेका अमेरिकी सैन्य बेसहरूलाई लक्षित गर्दै जवाफी आक्रमण सुरु गरेको छ।इरानले विशेष गरी कुवेत, बहराइन र जोर्डनमा रहेका अमेरिकी सैन्य ठेगानाहरूमा मिसाइल तथा ड्रोन आक्रमण गरेको दाबी गरेको छ।
यसअघि अमेरिकी सेनाको सेन्ट्रल कमान्ड (सेन्टकम)ले इरानभित्रका विभिन्न सैन्य संरचनामा ‘आत्मरक्षाका लागि’ भन्दै हवाई आक्रमण गरेको जनाएको थियो। अमेरिकी राष्ट्रपति डोनाल्ड ट्रम्पले इरानमाथि थप सैन्य कारबाहीको चेतावनी दिँदै कडा प्रतिक्रिया दिएका थिए।
इरानी सञ्चारमाध्यमका अनुसार अमेरिकी लडाकु विमानहरूले बन्दर अब्बास, केशम टापु, सिरिक, मिनाब तथा तेहरान नजिकको कारज क्षेत्रमा बमबारी गरेका छन्।
तनाव चुलिँदै जाँदा इरानले विश्वकै व्यस्त व्यापारिक जलमार्ग मानिने स्ट्रेट अफ हर्मोज बन्द गर्ने घोषणा गरेको छ। इरानले यस मार्गबाट तेल ट्याङ्कर तथा व्यावसायिक जहाज आवतजावत नगर्न चेतावनी दिएको छ।
यद्यपि अमेरिकी सेनाले भने आफ्ना कुनै पनि युद्धपोतमा आक्रमण नभएको र स्ट्रेट अफ हर्मोजमा व्यावसायिक जहाजहरूको आवतजावत जारी रहेको जनाएको छ।
यस घटनाक्रमले मध्यपूर्वको सुरक्षा अवस्था थप जटिल बनेको छ भने विश्वव्यापी ऊर्जा आपूर्ति, तेलको मूल्य र अन्तर्राष्ट्रिय अर्थतन्त्रमा गम्भीर प्रभाव पर्ने चिन्ता बढेको छ।
