भैँसी खेतमा पसेको निहुँमा दलित महिलामाथि कुटपिट

सिरहा । भैँसी खेतमा पसेको निहुँमा दलित महिलामाथि कुटपिट गरेको आरोपमा प्रहरीले एक जनालाई पक्राउ गरेको छ । सिरहामा दलित महिलामाथि कुटपिट गरेको आरोपमा नरहा गाउँपालिका-३ का ५५ वर्षीय पवित्रनारायण यादव पक्राउ परेका हुन् ।

उनलाई प्रहरीले जेठ ९ गते नयाँ चोहर्वाबाट पक्राउ गरिएको प्रहरीले जनाएको छ ।

यादवमाथि स्थानीय ६० वर्षीया फूलकुमारी मण्डललाई कुटपिट गरेको आरोप छ । गत वैशाख २७ गते अपराह्न आफ्नो भैँसी यादवको खेतमा पसेको निहुँमा मण्डलमाथि कुटपिट भएको प्रहरीले जनाएको छ ।

पीडित मण्डलले आफूमाथि अन्याय भएको भन्दै जिल्ला प्रहरी कार्यालयमा अभद्र व्यवहारसम्बन्धी कसुरमा उजुरी दिएकी छन् ।

गिरफ्तार गरिएका यादवलाई हिरासतमा राखी थप अनुसन्धान अघि बढाइएको जिल्ला प्रहरी कार्यालय सिरहाका सूचना अधिकारी तथा प्रहरी नायब उपरीक्षक रमेशबहादुर पालले जानकारी दिए ।