काठमाडौं। डोनाल्ड ट्रम्पका विशेष दूत सर्गियो गोर आज काठमाडौं आइपुग्ने भएका छन्। परराष्ट्र मन्त्रालय स्रोतका अनुसार उनी आज साँझ काठमाडौं ओर्लिनेछन्। बालेन शाह नेतृत्वमा सरकार गठन भएयता नेपाल भ्रमणमा आउने गोर सबैभन्दा उच्च तहका अमेरिकी कूटनीतिज्ञ मानिएका छन्।
३९ वर्षीय गोर दक्षिण तथा मध्य एशियाका लागि अमेरिकी विशेष दूत हुनुका साथै भारतका लागि अमेरिकी राजदूतका रूपमा पनि कार्यरत छन्। ट्रम्पका निकट सहयोगीका रूपमा चिनिने उनलाई दुईवटा महत्वपूर्ण जिम्मेवारी एकैसाथ दिइएको छ। यस आधारमा उनको हैसियत यसअघि काठमाडौं आएका अमेरिकी सहायक विदेशमन्त्री समिर पल कपुर भन्दा उच्च मानिएको छ।
उनको नेपाल भ्रमण मुख्यत: व्यवसाय, लगानी प्रवर्द्धन तथा दुई देशबीचको सम्बन्ध विस्तारमा केन्द्रित रहने बताइएको छ। भ्रमणका क्रममा उनले अर्थमन्त्री स्वर्णिम वाग्ले र परराष्ट्रमन्त्री शिशिर खनाल सँग भेट गर्ने कार्यक्रम तय भइसकेको छ।
यद्यपि, प्रधानमन्त्री बालेन शाहसँग गोरको भेट हुने/नहुने विषय अझै निश्चित भएको छैन। प्रधानमन्त्रीका प्रेस सल्लाहकार दीपा दाहालका अनुसार प्रधानमन्त्री हाल आन्तरिक मामिलामा, विशेषगरी सुशासनका विषयमा केन्द्रित रहेकाले भेटको टुंगो लाग्न बाँकी रहेको हो। पछिल्ला वर्षहरूमा विदेशी कूटनीतिज्ञहरूले प्रधानमन्त्रीसहित शीर्ष नेतृत्वसँग भेटघाट गर्ने अभ्यास रहे पनि वर्तमान सरकारमा त्यो परम्परा केही फरक देखिन थालेको छ।
यसअघि नेपाल आएका समिर पल कपुरले पनि प्रधानमन्त्रीसँग भेट नगरी रवि लामिछाने लगायतका नेताहरूसँग भेटघाट गरेर फर्किएका थिए। त्यसैगरी, यदि समय नमिले गोरले पनि उच्च मन्त्रीहरू तथा राजनीतिक नेतृत्वसँग भेट गरेर फर्किने सम्भावना रहेको स्रोतले जनाएको छ।
