प्रतिकात्मक फोटो विराटनगर । विराटनगरमा सोमबार दिउँसो एक अटो सेन्टरमा आगलागी हुँदा २३ लाख बराबरको क्षति भएको छ । विराटनगर महानगरपालिका–३ मा सञ्चालनमा रहेको ‘भूमि अटो सर्भिस सेन्टर’मा हिजो दिउँसो करिब २ बजेतिर बिजुलीको तार सर्ट भई आगलागी भएको थियो ।
विनोद शर्माले सञ्चालन गर्दै आएको उक्त अटो सेन्टरमा आगलागी हुँदा मर्मतका लागि राखिएको प्र ३–०१–०२५ च १३८६ नम्बरको कार आगोले जलेर पूर्ण रूपमा क्षतिग्रस्त भएको छ भने को २ च ३७१ नम्बरको अर्को कारमा आंशिक क्षति पुगेको छ ।
आगो निभाउने क्रममा सर्भिस सेन्टरका सञ्चालक शर्मा सामान्य घाइते भएका छन् । उनको दाहिने हात र खुट्टामा आगोले पोलेको छ । घाइते शर्माको विराटनगरस्थित आर्य न्युरो अस्पतालमा उपचार भइरहेको छ ।
स्थानीयको सहयोगमा करिब आधा घण्टापछि आगो नियन्त्रणमा लिइएको प्रहरीले जनाएको छ ।
