रंगेली । इलाका प्रशासन कार्यालय, रंगेलीले राहदानी (पासपोर्ट) वितरणलाई केही दिनभित्रै निरन्तरता दिने भएको छ । गत भदौमा भएको जेनजी आन्दोलनमा प्रिन्ट गर्ने मेसिन बिग्रिएपछि अवरुद्ध भएको विद्युतीय राहदानी सेवा केही दिनभित्रै सुरु हुने भएको हो ।
मेसिन जलेर ध्वस्त भएको सात महिनापछि प्रिन्ट मेसिन प्राप्त भएको र चाँडै नै पासपोर्ट वितरण सुरु हुने इलाका प्रशासन कार्यालय, रंगेलीका प्रमुख रोशन अधिकारीले जानकारी दिए । आफूहरूले पासपोर्ट वितरणको तयारी गरिरहेको जनाउँदै उनले अब रंगेलीबासीले राहदानी बनाउन विराटनगर वा अन्यत्र जानु पर्ने बाध्यता पुनः हट्ने उनको भनाइ छ ।
यस्तै, रंगेलीका पूर्वनगरप्रमुख दिलीप बगडियाले जेनजी विद्रोहपछि मेसिन जलेपछि रंगेली र आसपासका नागरिकलाई पासपोर्ट बनाउनलाई सास्ती भएको बताउँदै अब पुनः राहदानी वितरण थाल्नका लागि आफूले पहल गरिरहेको बताए ।
‘यहाँका नागरिकको गुनासो सुन्दै आएको थिएँ, यसैले मैले प्रमुख जिल्ला अधिकारी र राहदानी विभागका महानिर्देशसँग कुरा गरिरहेको थिएँ,’ उनले भने, ‘मेरो पहलले सार्थकता पाएको छ । अब चाँडै नै यहाँबाट नै राहदानी पाउनुहुनेछ ।’
अब इलाका प्रशासन रंगेलीको कार्यक्षेत्रमा पर्ने विभिन्न पालिकाका सेवाग्राहीले राहदानीकै लागि मात्र विराटनगर आउनुपर्ने बाध्यता हट्ने उनको भनाइ छ ।
