काठमाडौं । ‘सानुभाइ’ भनिने युवराज गुरुङ फेरि पक्राउ परेका छन्। उनलाई गएराति सामाखुसीबाट पक्राउ गरिएको एसएसपी रमेश थापाले जानकारी दिएका छन्।
गुरुङ यसअघि पनि पटक–पटक पक्राउ पर्ने र छुट्ने गर्दै आएका व्यक्ति हुन्। २०८० सालको असारमा ठमेलस्थित क्लब ओम्नियाका सञ्चालकमाथि कुटपिट गरेको आरोपमा पक्राउ परेका बेला उनलाई प्रहरीले हत्कडीसहित ठमेल क्षेत्रमा घुमाएको थियो। त्यसबेला गुण्डागर्दीमा संलग्नलाई ‘सबक’ सिकाउने भन्दै प्रहरीले यस्तो कदम चालेको थियो।
पछि जिल्ला प्रशासन कार्यालय काठमाडौंले अभद्र व्यवहारको कसुरमा उनलाई १० हजार रुपैयाँ धरौटीमा रिहा गरेको थियो। त्यसयता पनि उनी कुटपिट र असुलीका घटनामा संलग्न हुँदै पक्राउ पर्ने र छुट्ने क्रम दोहोरिँदै आएको छ।
प्रहरीका अनुसार गुरुङ कुनै समय गुण्डा नाइके कुमार घैंटेको समूहमा सक्रिय थिए। घैंटे प्रहरी मुठभेडमा २०७२ भदौ ३ गते मारिएपछि गुरुङ ‘बुलेटप्रुफ ज्याकेट’ लगाएर हिँड्ने गरेको बताइएको छ।
उनी २०७२ पुस २५ गते नुवाकोटबाट २८ बोर रिभल्बर र एक थान गोलीसहित पक्राउ परेका थिए। सो क्रममा उनले लगाएको बुलेटप्रुफ ज्याकेट पनि प्रहरीले बरामद गरेको थियो। यसअघि २०६७ कात्तिक ७ गते गोंगबुस्थित गणेशस्थान नजिक मिलन लामामाथि धारिलो हतियार प्रहार गरेको घटनामा पनि गुरुङ संलग्न रहेको प्रहरी रेकर्डमा उल्लेख छ।
२०७६ सालमा उनीविरुद्ध बैंकिङ कसुरमा दरबारमार्गबाट मुद्दा दर्ता भएको थियो भने २०७७ कात्तिक २६ गते ‘ताज’ भनिने भीम गुरुङलाई पेस्तोल देखाएर कुटपिट गरेको आरोपमा पनि पक्राउ परेका थिए।
यसैगरी २०८२ साउनमा ठमेलको एक दोहोरी साँझमा झगडा गरेको आरोपमा पनि उनी पक्राउ परेका थिए।
